Ирак Елекеев: Кімнің депутат болатынын Ақорда шешеді

1641

М. Мейірбекқызы: Саяси элитаның ішінде ыңғайсыз, сыни сұрақ қоятын журналисті оппозиционер, антогонист, агрессор, нигилист, популист деп ойлайтындар көп сияқты. Сіз де оларды  қауіпті, жағымсыз адам деп санайсыз ба?

И.Елекеев: Бұл бұрыннан бар үрдіс. Билікті сынап жазатын журналисті жоғары жақта жақсы көрмейді. Оған өзгелер емес,  өзіміз  кінәліміз.

М. Мейірбекқызы:  Өзіміз дейсіз… Демек, сіз де әлі біздің қатарда жүрсіз ғой.

И.Елекеев: Иә.

М. Мейірбекқызы:  Неге біз кінәліміз?

И.Елекеев: Биліктің жақсы  жақтары бар. Жаман тұстары  да аз емес.  Ақ пен қараны айыру журналисттің миссиясы болмауы тиіс.  Оның міндеті — ақпаратты обьективті жеткізу ғана. Өзін тұлға қылып көрсетіп, біреудің жұмысына баға берудің қажеті қанша?! Бұл бір мәселе. Екіншіден, журналистердің көбісі конформистке айналды. Кеше ғана мен бір жиында болдым. Сол жерде сөйлеген спикерлер  бейбіт шерудің болғанын үш күн кішіктеріп хабарлаған мемлекеттік телеарналарды қатты сынға алды. Екеуіміз де бұрын мемлекеттік арналарда жұмыс істедік.  Сынның орынды екені мойындаймыз ғой? Сол шеруге он сегіз миллион адамның көп болса жүз мыңы шығуы мүмкін. Мемлекеттік БАҚ-тың журналистері бұл жаңалықты жасырмай, жариялаудан неге қорқады? Шерушілердің  наразылығы бүкіл халықтың қарсылығын білдіре ме? Әрине, жоқ.  Осындай қорқақтық, жалтақтықтың салдары неге әкеліп соққанын білесіз. «Хабар» мен «Қазақстанда» не айтылатыны белгілі» деп бұл екі арнаға сенбейтін адам көбейді.  Кезінде «31»  мен «КТК»- да өткірлік бар еді. Қазір оларда да сүзгі бары сезіледі. «Неге?» деген сұрақ қойшы?

М. Мейірбекқызы: Неге бұлай болды?

И. Елекеев: Жоғарыдан тапсырма берілетін болуы керек. Олар қоғамда болып жатқан өзгерістерді көрсетудің қажеті жоқ деп ойлайтын сынды.  Рационалды қадам деп айту қиын.

М. Мейірбекқызы: Қысқа қайырып жауап берсеңіз. Себебі, әлі сұрағым көп.  Алаңға  адамдар неге шығып жүр?  Оларға тыныштық жақпай ма? Қанағаты жоқ па?

И.Елекеев: Халық отыз жылда көп дүниені көрді.  Енді олар өзгерісті қалап жатыр.

М.Мейірбекқызы: Біз әңгімеміздің бағытын өзгертейікші. Қоғам журналистерге ғана емес, депутаттарға да риза емес қой.  

И.Елекеев: Риза емес.

М. Мейірбекқызы: Өзіңіз депутат болған бұрынғы Жоғарғы Кеңестің тәуелсіз тұлғаларын  сағынатындар көп. Ал бүгінгі парламенттің белсенділігі, шығарған заңдары, олардың бет-бейнесі, риторикасы көпшіліктің көңілін қалдырды. Бұл антипатияны олар білмейді емес, біледі.  Алтыншы шақырылым депутаттарының ең болмағанда біреуі сіз сияқты «Халық сенімін ақтай алмасақ, осылай үндемей отыра беретін болсақ, бірауыздан тарайық» деп  мәлімдеуі үшін  оларға әлі қанша сын айтылуы керек? Қанша сенім кеңесі құрылуы қажет?

И.Елекеев: Біраз депутаттар  обалы не керек, өткір-өткір ойларын  ашық айтып жүр.

М.Мейірбекқызы: Солай ма?

И. Елекев: Бірақ  олар парламенттің мінберінде емес, осылай екеуіміз сияқты оңаша отырғанда ақтарылады. Ал парламентте сөйлемеуінің бірнеше себебі бар. Білесіз, олардың басым бөлігі «Нұр Отан» партиясының қолдауымен депутат болғандар.  Тәуелсіз болсақ, билік партиясына жақпай қаламыз ба деп жалтақтайтын сияқты. Уақытымыз бар ғой, осы жерде бір  әділетсіз дүниені айтқым келіп тұр. Білесің, конституция бойынша әр адамның сайлауға түсуге,  сайлауға құқығы бар. Бірақ осы  парламенттегі принцип менің құқығымды бұзып отыр.  Мен тағы да депутат болғым келеді. «Нұр Отан» партиясы мені қолдамайтындықтан бола алмай жүрмін. Ал басқа партияның мүшесі болуға ұятым жібермейді. Шынымды айтсам, барғым да келмейді. Міне, осы жерде менің сайлауға түсетін құқығым бұзылды, деп есептеймін.

М. Мейірбекқызы:  Демек, депутаттар белсенді болсақ, партияның тізіміне кірмей қаламыз деп қорқады ма?

И.Елекеев: Иә, бұл бір себеп. Екіншіден көп депутаттар өз құқығын білмейді. Мен «Көзқарасты» жүргізген кезде Жамбыл Ахметбековпен сұхбаттастым. «Неге сендер депутаттың конституцияда жазылған құқығы мен мүмкіндігін пайдаланбайсыңдар?» деп сұрадым.  «Біз күнде пайдаланып жатырмыз ғой» деп жауап берді.  Бірақ олай емес қой.

М. Мейірбекқызы: Өзіңіз кезінде  депутаттық құқыңызды толық пайдалана алдыңыз ба,  аға?

И. Елекеев: Бірінші шақырылымда қаржы министрі болған Сауат Мыңбаевты парламентке шақыртып алып, есебін тыңдадық. Сынадық. Біз айтқан проблемаларды шешуге алты ай уақыт бердік.  Ол кезде тіпті министрге сенім білдірмеу құқығына дейін пайдаландық. Тағы да бір мысал есіме түсіп отыр.  Жеке өзім депутаттық сауалнама жасап,  ол кезде еңбек министрі болып жүрген Гүлшара Әбдіхалықованы парламентке шақырттым. «Халықтың алдында менің сұрақтарыма жауап беріңіз» дедім. Жауап берді.  Ал қазіргі депутаттардың атқарушы биліктің есеп беруін талап еткенін естідіңіз бе? 2011 жылы Жаңаөзенде ереуіл басталғанда Мәжілістегі депутаттарға барайық деп бірнеше рет айттым. «Еуропарламенттің депутаттарына дейін келгенде біз қалай  кабинетімізде тып-тыныш  отырамыз» деп сұрақ қойдым… Ешкім мені қолдаған жоқ.

М. Мейірбекқызы:  Сіздің сол жылдары  журналистерге депутаттық құқығыңыздың шектеліп жатқаны жайында айтқаныңыз есіме түсіп отыр. «Спикер көп жағдайда сөз бермейді, берсе де, ортасынан үзіп тастайды» деп ашуланып жүруші едіңіз.

И. Елекеев: Ол рас.  «Нұр Отандық» депутаттардың өздеріне ортақ бір «принциптері» бар. Олар «Нұр Отан» партиясына мүше министрлерді сынаған дұрыс емес деп санайды.  Мұндай «ауызбіршіліктің» арты жақсылыққа әкелді ме? «Әй, дейтін әже, қой, дейтін қожа» болмағандықтан қанша министр қылмыс жасады?! Үкіметтің бұрынғы басшына дейін заң бұзды. Парламент сұсты болғанда атқарушы билік аяғын тартатын еді. Ал қазір олардың  президенттің  алдында  ғана жауапкершілігі бар.

М. Мейірбекқызы: Аға, шыныңызды айтыңызшы,   2011 жылы «халықтың сенімін ақтай алмасақ, тарайық» деген мәлімдемені сол жақтағы басшылармен келісіп жасадыңыз ба?  Өзіңіз айтқандай, партияға тәуелді  парламентте ешкімге ескертпестен осылай айтқаныңызға сену қиын.

И.Елекеев: Кейбіреулер  сол кезде Ақорданың тапсырмасы деп ойлады. Жоқ, олай емес. Ұзақ уақыт ойланып жүріп, осындай қадамға бардым.  Бір айдан кейін Мәжілісті тарату туралы құжатқа сексенге жуық депутат қол қойды. Бірақ мені қалдырып кетті. Егер Ирак Елекеевті Ақорда мен билік қолдаса, құжатқа қолды бірінші болып маған қойдыру керек еді ғой. Солай ма?

М. Мейірбекқызы:  Иә. Бірақ сіз тағы да сайлауға түскіңіз келіпті. Құқығыңызды шектейтін, ұсынысыңызды қолдамайтын жерге неге қайтып барғыңыз келді?  

И. Елекеев: Жасырмаймын,«Нұр Отан» тағы да ұсынатын шығар деп ойладым. Бірақ ешкім телефон соққан жоқ.  Дәл сол уақытта «Хабар» агенттігінен басқа ұсыныс түсті. Ринат Кертаев: «Аға, мәжілісте сәрсенбі күні бір рет тіл қатқаннан гөрі «Хабарда» күн сайын сөйлеген жақсы емес пе? Бізге келсеңізші», деп шақырған соң, келістім.

М. Мейірбекқызы:  Сізді зейнет жасына келгендіктен  «Нұр Отанның» тізіміне  кірмеді деп естідім.

И. Елекеев: Маған да таныстарым солай айтты.

М. Мейірбекқызы: Жасыңыз себеп болды ма, мәлімдемеңіз бе?

И.Елекеев: Екі факторды да жоққа шығармаймын. Бірақ тізімде зейнет жасынан асып кеткен депутаттар болды ғой. Қуаныш Сұлтановтар әлі күнге дейін отыр.

М. Мейірбекқызы: Сегіз жыл бұрын «Дәл қазіргі момақан күйімізбен жүре берсек, күн өткен сайын билік партиясынан халықтың күдері үзіледі» депсіз.  Сіздің айтқаныңыз келді ме?

И.Елекеев: Айтқаным келді. Сенім кеңесінің құрылуы сөзіме дәлел. Қазір «Нұр Отанға» сенбейтіндер, оны қолдамайтындар көп.

М. Мейірбекқызы: Партияның кемшіліктері бар екенін білесіз. Оны ашық айтып отырсыз. Бірақ әлі  «Нұр Отанға» мүшесіз. Неге?

И.Елекеев:  Партияның алдына қойған мақсаттары дұрыс. Бірақ ол орындалмайды. Себебі талап қатаң емес. Бір оқиғаны еске түсірейікші. Президент сенімін ақтамады деп Әбдірахимовты қызметінен босатты. Солай ма?

М. Мейірбекқызы:  Солай.

И.Елекеев: Бірақ ол келесі күні «Нұр Отанның» съезінде отырды. Бұл не деген сөз?

М. Мейірбекқызы: Әбдірахимовқа басқа адам сенім артып отыр.

И.Елекеев: Әңгіме сонда.

М. Мейірбекқызы: Парламентте биліктің партиясынан бөлек, екі «оппозициялық» партия отыр. Плюрализм неге жоқ?

И.Елекеев: Меніңше, үш партияның да  депутаттарының тізімі Ақордада бекітіледі. Кімнің депутат болатынын, кімнің болмайтынын Ақорда шешеді. Өзінің съезінде «мына адамдар жұмыс істеуге ыңғайлы. Біз оларды қолдаймыз» деп ұсыныс береді. Бұл шындық.  Мұны маған Владислав Косарев те , «Ақжолдың» мүшелері де айтты. «Ақжолдың» кейбір мүшелері депутат болуы үшін ақша бергендерін естідім. Бірақ тізімге кірмей қалыпты.

М. Мейірбекқызы:  Неге?

И.Елекеев: Ақорда қолдамаған. Бірақ олардың берген ақшалары қалтаға салынған жоқ. Үгіт- насихатқа жаратылған.

М. Мейірбекқызы: Жақсы депутаттарды қайдан табамыз?

И.Елекеев: Ол үшін сайлау туралы заңға өзгеріс енгізіп, ең болмағанда мына Ресей сияқты елу пайыз мажоритарлық жүйеге көшуіміз керек. Әйтпесе, ешнәрсе өзгермейді.

М. Мейірбекқызы: Тұңғыш Президенттің осы мәселеге қатысты мәлімдемесінен кейін мажоритарлық жүйені жақтайтын либералдар күрт азайып кетті.

И. Елекеев: Мен өз позициямда қаламын. Бұдан былай бізге пропорционалдық жүйе болмайды.

Мақпал, мені бұл мәселелерден бөлек, әлеуметтік саясатымыз алаңдатады.  Мен баяғыдай Англияға барғанда әдемі ғимараттардан бөлек, ескі үйлерді көрдім.  Қасымдағы адам бұл үйлердің тарихын баяндап берді. Он тоғызыншы ғасырда ерлі-зайыпты ажырасып, әйелі баласымен баспанасыз қалыпты. Сол кезде Сот  балалы аналардың барлығында үй болуы керек деген шешім шығарыпты.  Жаңағы ескі үйлер соларға арналып салынған екен. Сол заманда ана мен баланың басында баспана болды. Мен баспана сұраған аналарды айыптайтындарды  түсінбеймін. Олар бала табарда мемлекетпен ойласуға міндетті емес.  Демографияны көтеру басты мақсатымыз еді. Не өзгерді?  Адам өмірге келгеннен кейін оның баспанасы болуы керек. Мемлекет өз азаматтарына үй салып беруге міндетті. Олар тұрып жатқан үйіне жұмыс істеп ақшасын төлеуі керек. Бұл қиын шаруа емес қой.

М.Мейірбекқызы: Шенеуніктер қиын дейді.   Қала әкімі орынбасарының «жан айқайын» естіген шығарсыз?  Олардың риторикасынан жағдайымыз жоқ  дегенді түсіндім. Олардың сөзіне сенбейсіз бе?

И.Елекеев: Әрине, жағдайымыз келеді. Қазақстанда өте бай жүз алпыс екі адам бар екенін бәріміз білеміз. Олар Стив Джобс сияқты бір нәрсені ойлап тауып байыды ма?  Жақында шетелден келген  қонақтарыма «Риксостан» үш бөтелке суды алты мың теңгеге сатып алдым. Жүз теңгелік судың үстінен қанша пайыз пайда көріп отыр? Оны кім тексеріп жатыр? Ешкім. Себебі,  «Риксосқа» өзіміздің «ағайындар» ие.  Шетелде кәсіпкерлер тауардың үстінен он, он бес пайыз пайда  көрсе риза болады.

М. Мейірбекқызы: Бір сұхбатыңызда парламенттің құрамында ірі бизнесмендерді қолдайтын лоббистер отыр деп айтып едіңіз.

И. Елекеев: Олар болмағанда жүз алпыс екі адам дәл осылай байып кетер ме еді?! Олардың барлығы да билік эстеблишментіне қатысы бар, солардың жанында жүрген адамдар ғой.

М.Мейірбекқызы: Қоғамдағы либералдық көзқарасымен танылған екі- үш азамат сұхбат алдында Жәкішев ісі мен митинг мәселесі табу болсын деп талап қойды. Сіз үшін де бұл екі тақырып жабық па?

И. Елекеев:  Ашық тақырып. Мен журналист, бұрынғы депутат ретінде ғана емес, заңгер ретінде Жәкішевті босату керек деп ойлаймын. Он төрт жылға сотталған адамды тоғыз жылдан кейін босатуға мүмкіндік бар. Неге әлі шықпағанын түсінбеймін.

М. Мейірбекқызы: Жәкішевтің бостандыққа шықпауы сіздің экс-әріптестеріңіз — судьялардың репутациясына дақ түсірді деп ойлайсыз ба?

И. Елекеев: Сөзсіз дақ түсірді. Ал митинг мәселесіне келетін болсақ, Президенттің рұқсат бергені жақсы болды.

М. Мейірбекқызы: Рұқсат етілген бейбіт шеруге Жәкішевты қолдап шығасыз ба?

И. Елекеев:  Рұқсат етілген бейбіт митинг ұйымдастырылса міндетті түрде Жәкішевты қолдап шығатын едім.  «Қазатомөнеркәсіп» ұлттық компаниясының бұрын бастығы болған Школьникпен кездескенімде Жәкішев ісін  сұрадым. Ол
«Мұхтардың ақша ұрлағаны рас», деп айтты.  Қылмыс жасаған күннің өзінде оны тоғыз жылдан кейін бостандыққа шығарсақ, әділетті болар еді. Тіпті адам өлтіргендер де ерте босап жатыр ғой. Қазақстанның түрмелері  әлі күнге дейін отызыншы жылдардағы жағдайда. Ол жақта тоғыз жыл тұрмақ, бес жыл отырсаң, деңсаулығың құриды.

Ішкі істер министрлігі қызметкерлерінің жартысын қысқарту керек. Біздің мемлекет үшін олардың саны өте көп. Еуропаға  парламент делегациясының басшысымен барғанымда алдымызда   жол полициясының бір машинасын көрмедік. Мәжілістің төрағасы жұмысына велосипедпен баратынын естідім. Бізге күні кеше елу екі елдің спикерлері келді. Барлығына бір-бір көліктен бөлдік. Қайдан келген байлық?  Неге асып-тасып жүрміз?

Мақпал Мейірбекқызы: Хабар телеарнасында Ләйлә Сұлтанқызына сұхбат бергенде :«Біздің ата заңымызда цензура жоқ деп жазылған. Бірақ біздің журналистердің өз құқығын пайдалануға батылдығы жетпейді», — дегеніңізді естідім. Ресейде осындай ашық жазатын Голунов деген журналистке жала жабылып оны ұзақ жылға соттамақ болғанда сол елдің барлық зиялылары мен белсенділері наразылығын білдіріп, жазадан сақтап қалды.  Біздің елде дәл сондай батыл журналистің басына іс түссе, сіз заңгер ретінде оны қорғай аласыз ба? Қоғам қолдай ала ма?

И. Елекеев: Барлығы үшін жауап бере алмаймын. Бірақ өзім қолдайтын едім. Айтқанымнан таңбаймын, журналистер конституцияда шектелген тақырыптарды ғана айналып өтуі тиіс.  Қалған проблемаларды ашық айтуы керек. Журналистік зерттеу жүргізіп, құпия істерді ашуы қажет.

М. Мейірбекқызы: Жасыратыны жоқ, журналистика-компромиске келуді қажет ететін мамандық, келісесіз бе?

И. Елекеев: Саған ашық  айтайын,  «Көзқарас» бағдарламасын жүргізген кезде Мұхтар Шахановты шақырғым келді. Басшылық тыйым салды. Мұхтар Шахановтың қатты айтатынын рас, бірақ ол қазаққа   жау емес қой деп түсіндіріп көрдім. Көндіргім келгенмен, рұқсат ала алмадым. Өткенде Амангелді Айталы өз мерейтойына Мұхтар Шаханов пен Олжас Сүлейменовты шақырды. Ұзақ жылдар бойы позициялары ұқсамағандықтан айтысып жүрген, өкпелеп жүрген екі ақын бір-біріне жау емес екенін білдіріп, кездесуге келуі өте әсерлі болды. Адамдардың ойы бір жерден шығуы міндет емес. Бірақ бір -бірін түсінуі, қабылдауы міндет.  Пікірлері әр-алуан адамдарды қара тізімге кіргізуге құмар мемлекеттік арналар екі ақыннан сабақ алуы керек.

М.Мейірбекқызы: Сол күйі сұхбатыңызға шақыра алмадыңыз ба?

И.Елекеев: Жоқ. Бақыт Түменованың саяси көзқарасы үшін емес дәрігер ретінде шақырғым келіп еді. Болмады. Әміржан Қосановты да шақыра алмадым. Бес-алты адамды шақыруға тиым салынды. Мұндай «шорт-листтің» сен жұмыс істеген арнада да бары белгілі.

М. Мейірбекқызы: Журналисттік құқығым шектелді деп (мәжілістегідей ашуланып) кетіп қалғыңыз келмеді ме?

Ирак Елекеев: Жоқ, ондай ой болған жоқ.  Мемлекеттік арналар оппозиционерлерді шақыруға тиым салса да,  министрлерді шақыруға рұқсат береді ғой. Осы мүмкіндікті пайдаланып,  сұхбат бермейтін министрлерді шақырып, ешқандай журналист қоймаған сұрақтарды қойдым. Талай шенеуніктер менің өткір сауалдарымнан қашты. Әсет Исекешовты министр, вице-премьер болған кезде бірнеше рет шақырдым.  Сылтау айтып келген жоқ. Дегенмен  шетелдің басшылары, журналистері, сарапшыларымен еркін сұхбат жасай алдым. Орталық Африка Республикасында өлтіріп кеткен әскери журналист Орхан Джемальдың әкесі Гейдар Джемальды эфирге шығардым. Қытайдың Қазақстандағы (сол кездегі) елшісін студияға шақырып, «Қытай мемлекетінің басшысы Си Цзиньпиннің әкесі кезінде ұлттық шеруге рұқсат еткен еді. Ал баласы неге ұлттық митингтерге тыйым салып жатыр?»  деп сұрақ қойдым. Сол бағдарламаның рейтингісі жоғары болды.  Бес жылда ешкім менің журналистік жұмысымды сынаған жоқ. Өзге журналистер сияқты Елбасыны жеке танысам да ол кісіні ертелі-кеш мақтап, ұпай жинаған жоқпын. 

М. Мейірбекқызы: Еңбек шарты кімнің бастамасымен тоқтады?

И. Елекеев: Хабардың басшыларының тарапынан бұзылды. «Бір жүргізуші бағдарламаны ұзақ жүргізсе көрермен  қарамауы мүмкін»,- деді. Егер олардың мұндай шешімін алдын ала білгенімде соңғы эфирде ойымдағының бәрін айтып кететін  едім ғой. Соны сезгендей, алдын-ала айтпай қойды ғой. (күледі)

М. Мейірбекқызы: Эфир кезінде Әблязовтың атын атағаным үшін қоңырау соғылды деп  едіңіз. Қазір мемлекеттік арналарда оның есімі аталып жатыр. Тіпті, онымен Ермұхамед Ертісбаев ашық пікір-талас өткізді. Бұл ненің белгісі?

И. Елекеев: Биыл қоғам оянды. Барлығымыз өзгердік. Көп балалы аналардың ашық наразылығы, батыстағы бауырларымыздың белсенділігі батыл болуға түрткі болды. Осы фактілерді ескеріп, билік өткір мәселелерді ашық талқылап көрейік деп эсперимент жасаған сынды. Көп ойланып, тілі өткір, сөзге шешен Ертісбаевты саяси «баттлға» жіберді. Бірақ полемика кезінде  Ертісбаев өтірік  қосып, дәлелсіз сөйлеп сынның астында қалды. Ұтылды.

М. Мейірбекқызы: Сіз биліктің төрт тармағында қызмет еттіңіз ғой. Егер Президент Қасым -Жомарт Тоқаев  төрт саланың біріне басшы болыңыз деп сенімді өкілдері арқылы ұсыныс жасаса, көңіліңіз қайсысын қалайтын еді?

И. Елекеев: Ойланбастан журналистиканы таңдайтын едім. Журналистер мемлекетті дамыту үшін үлкен еңбек атқара алады. Олар көрген білгенін ашық айтып отырса, халық адаспайды. Ал билік әрқашан тонуста жүреді. Зеленский президент болғалы парламентте журналистердің көбейгені кездейсоқтық емес.

М. Мейірбекқызы: Американың саясатындағы транспаренттіліктің арқасында Трамп Зеленскиймен телефон арқылы сөйлескен әңгімесінің стенограммасын жариялауға мәжбүр болды. Қарсыласқанда импичмент жарияланатын еді. Біздің билік те ашық саясат жүргізу керек деп жиі айтады.  Қытай интеграциясына қарсылық күннен-күнге күшеюде. Халықтың уайымын сейілту үшін  құжат, келісімдерді жариялауға, референдум өткізуге болмас пе еді?  

 И. Елекеев: Қытайға қатысты ксенофобия бүгін  пайда болған жоқ. Ата-бабамыз бұл елдің қауіпті екенін өткен ғасырларда айтып кеткен. Халықтың Қытаймен тығыз байланыс орнатуға қырсы болғанын түсінемін, және оларды қолдаймын. Елу бес зауыттың салынуына мен де қарсымын. Қажет емес деп есептеймін.  Қазақстан іргелес елмен емес, Оңтүстік Корея, Жапония сияқты алыстағы  елдермен серіктес болса ешкім наразы болмайды.   Билік ешнәрсені жасырмай, жасалған келісім-шарт, құжаттарды жариялауы керек.  

М. Мейірбекқызы: Кенже балаңызды АҚШ-тың әйгілі компаниясы жұмысқа шақырғанын естідім. Қазір Америкада тұра ма?

И. Елекеев: Иә, бұрын «Самұрық-Қазынада» жұмыс істеген еді.  Арнайы тесттен өтіп, жоғары нәтиже көрсеткеннен кейін Американың белгілі компания өздері шақырыпты. Олар қазір Стамбул қаласының даму стратегиясын жазып жатыр екен. Жақсы көретін ісімен айналысып жүр. Үш  балама да байлық жинаған жоқпын. Білім алуларына жағдай жасадым. Мүмкіндік бердім. Ешқайсысы «Болашақпен» оқыған жоқ. Ақы төлеп өзім шетелде оқыттым.

М. Мейірбекқызы: Бір сұхбатыңызда білімді жастардың шетелге кетіп жатқанын қынжылып айтқан едіңіз. Кенже балаңыз Американың азаматтығын алып, сол жақта тұрақтаймын деп шешсе, сіз оны  қолдайсыз ба?

И. Елекеев: Патриот ретінде балаларымның елге қызмет еткенін қалаймын.  Бірақ Қазақстаннан кетемін десе өз еркі. Мен қарсылық білдірмеймін. Қуанышыма қарай  елге қайтқысы келетін сияқты. Жастардың кадрлық резервіне кіріпті. 

М. Мейірбекқызы: Ұлыңызға сәттілік тілеймін. Сұхбат үшін рахмет!