Қазақстан шетелге 21 млн долларға шоколад сатты

88
21
Фото: culture.ru

Алматы. 27 қараша. 7kun.kz — 2019 жылдың басынан бастап шоколадты сыртқы нарықтарға сатудан түскен кіріс 21 миллион долларды құрады, деп хабарлады Ауыл шаруашылығы министрлігі.

Қазақстанның кондитерлік өнімдерінің экспорты 42,6 млн долларды құрады.

Бұл ретте ауыл шаруашылығы шикізатынан өңделген дайын өнімді экспорттаудағы ең үлкен үлес ұн (31%) және өсімдік майы (15%) сияқты тауарлар топтарына тиесілі.

«Жалпы алғанда, осы жылдың тоғыз айында өңделген өнімдер экспорты 757 млн ​​долларды құрады, оның 77%-ы (580 млн доллар) — ұн, өсімдік майы, сүт өнімдері, кондитерлік өнімдер, торт, балық өнімдері, минералды және газдалған сулар, шоколад, макарон және құс еті», — деп мәлімдеді АШМ.

Бұған дейін Ауыл шаруашылығы министрінің орынбасары Айдарбек Сапаров биыл ауылшаруашылық шикізатынан өндірілетін өнім көлемі 2,5 пайызға артып, шамамен 1,2 трлн теңгені құрайды деп мәлімдеді.

Бұл ретте қайта өңделген өнім экспортының көлемі өткен жылғы деңгейден де асып түсті. Сапаровтың айтуынша, АШМ жыл соңына дейін ауылшаруашылық шикізатынан өңделген дайын өнімнің экспортын 1,3 миллиард долларға жеткізуді жоспарлап отыр.