Тұрғын үй құрылыс жинақ банкі өтемақы төлей бастайды

Фото: bnews.kz

Тұрғын үй құрылыс жинақ банкі 25-маусымнан бастап өтемақы төлей бастайды. Бұл туралы банктің баспасөз қызметі хабарлады.

25-ші маусым күні салымшылар шотына 23,6 млрд теңге көлемінде  бағам айырмасының алғашқы траншы беріледі. Оның 8,6 млрд. теңгесі банктің жеке қаражатынан бөлінбек.

«Өтемақы, бірінші кезекте, 2016 жылдың 31-ші мамырына дейін банкпен қосымша келісімге қол қойып үлгерген салымшыларға  төленеді.  221 705 салымшы  122,9 млрд. теңгені  құрайтын депозиттің жалпы сомасынан өтемақы алады», — делінген банкінің баспасөз хабарламасында.

Айта кетейік, ТҚЖБ 1-ші маусымда өтемақы алуға қосымша келісім жасау мерзімі бір айға ұзарғанын хабарлаған еді. Қазіргі таңда, өтемақы төлеуге жататын 452 167 салымның  140 464 шартына әлі де қол қойылмаған. Олардың басым бөлігі шоттарында 1 млн теңгеден аз сома жатқан клиенттер.  Банктің баспасөз-қызметі қосымша келісімге қол қоюға соңғы 8 күн қалғанын ескертіп отыр. Үлгермеген салымшыларға  өтемақы төленбейді.

Өтемақының алғашқы траншының қалған  9,3 млрд  теңгесі ағымдағы жылдың 1 тамызына дейін беріледі. Ол қаражатты уақытында қосымша келісім жасап үлгермей,  ұзартылған уақытта келісім жасасқан салымшылар алады.

Банк салымшыларына бағам айырмасының екінші траншы  толық көлемде 2017 жылдың 1 шілдесіне дейін төленеді.

Жалпы алғанда, өтемақы көлемі 35,5%-ды құрайды. Салымшыларға  2016 жылы   19,2%  немесе  32,9 млрд. теңге, ал 2017 жылы  16,3% өтемақы төленеді. Ол 28 млрд. теңгені құрайды.