Алматыда «Стелс-омикрон» штаммы өршіп тұр: Қала сары аймаққа оралуы мүмкін

Алматы. 3 шілде. 7kun.kz – Алматыда коронавирус жұқтырғандар саны артып келеді. Сараптамалар індетке стелс-омикрон штаммының өршуі себеп болғанын көрсетті. Бұл туралы Алматы санитарлық-эпидемиологиялық бақылау департаменті хабарлады.

«23 маусымда зертханаға ПТР оң нәтижесі бар 74 сынама жеткізілді, 58 сынама стелс-мутация ықтималдығын көрсетті, ал қалған 16-да омикрон-мутация үлгісі тіркелді», — деп хабарлады ведомствода.

29 маусымдағы жағдай бойынша Денсаулық сақтау министрлігінде инфекция жұқтырған 497 жағдай тіркелді. Оның ішінде 275 науқас мүлде екпе алмаса, 112-сі екпе алған, бірақ 6 айдан кейін ревакцинация жасамаған.

«Бұл вакцинация мен ревакцинация алмағандардың «Стелс-омикрон» жұқтырғанын көрсетеді. Вакцинаны бір жылдан астам уақыт бұрын алғандар да ауру жұқтыруы мүмкін. «Стелс-омикрон» әлсіреген иммунитетті бұзып, ағзаға ену қабілетіне ие», – дейді мамандар.

Қалалық санитарлық-эпидемиологиялық бақылау департаменті вирустың таралу қарқыны бойынша Алматының «сары» аймаққа өтуі мүмкін екенін атап өтті.