АймақАлматы облысыЖаңалықтарТаңдаулы1

«Маревен Фуд Тянь-Шань» азық-түлік шығаратын зауыты Алматы облысында ашылады

Алматы. 24 қаңтар. 7kun.kz – Қапшағай қаласының «Арна» индустриалды аймағында орналасқан «Маревен Фуд Тянь-Шань» ЖШС-ның азық-түлік шығаратын зауыты 2018 жылғы маусым айының соңында ашылады. Экспортқа бағытталған кәсіпорын алғашқы дайын өнімін  1-желісі іске қосылатын сәуір айында шығарады деп жоспарланып отыр. Бұл туралы бүгін облыс әкімі Амандық Баталовтың «Маревен Фуд Холдингс» холдингінің өкілдерімен кездесуі барысында белгілі болды.

Кездесу барысында инвесторлар жобаның жүзеге асырылу барысы, жергілікті атқарушы органмен бірлесіп шешуге тиіс бірқатар мәселелер туралы баяндады.

«Маревен Фуд Холдингс» холдингінің атқарушы директоры Мишель Чангтың айтуынша, қазіргі кезде зауыттың өндірістік және инженерлік кешені дайын, ішкі инженерлік коммуникациясы толығымен жүргізілген. Қажетті құрал-жабдықтар сатып алынып, қоймада сақтаулы. 1-тестік желісі сәуір айында іске қосылып, алғашқы өнімдері шығарылады. Зауыт нарыққа кәсіпорын іске толық қосылғаннан кейін шығады. Зауыт маусым айының соңында ашылады деп жоспарланған.

Кездесуде айтылғандай, 2018 жылға 24 млрд теңге болатын сатылым көлемі белгіленіп отыр. Зауыт тез пісетін кеспе, сорпа дәмдеуіштері, макарондар – жалпы саны 15 түрлі өнім шығаратын болады. Дайын өнімнің 70 пайызы Азияның 5 еліне, Монғолия мен Қытайға шығарылады. Өндіріс барысында 5 өнім — ұн, тұз, картон және басқа да қазақстандық өнімдер қолданылады. Кәсіпорын 500 адамды тұрақты жұмыс орнымен қамтиды. Оның 90 пайызын жергілікті тұрғындар құрайтын болады.

Инвесторлар зауытқа кіре беріске дейін жол төсеу, темір жолға шығатын мүмкіндік жасау қажеттіліктерін айтты. Облыс әкімі Амандық Баталов бұл мәселелерді шешуді бақылауына алатынын жеткізді.

Облыс әкімінің орынбасары Жеңіс Тұяқовтың айтуынша, қиыршық тас-құм төселетін жолдың құрылысы наурызда аяқталса, ауа райының қолайлылығына қарай сәуір-мамыр айларында асфальт төселетін болады. Темір жол мәселесі де жыл соңына дейін шешімін табады. Зауыт Қапшағай қаласындағы газ желісіне қосылады.

«Біздің облыстың аумағында осындай ірі инвестициялық жобаның жүзеге асырылып жатқанына қуаныштымын. Бұл кәсіпорын өз кезегінде облыстың азық-түлік өндірісіне өзінің үлкен үлесін қосатын болады. Ең бастысы, зауыт 500 тұрақты жұмыс орнын құра отырып, жергілікті тұрғындарды жұмыспен қамтиды. Оған қоса өнім өзіміздің отандық ұннан дайындалып, дайын өнім «Қазақстанда жасалған» деген белгімен экспортқа шығарылатын болады», — деді облыс әкімі А. Баталов.

Алматы облысы әкімінің баспасөз қызметі

Tags

Осы айдарда

Close