Алматы. 11 тамыз. 7kun.kz – Қаңтар оқиғасы кезінде өртеніп кеткен әкімдікті қалпына келтіру уақыты ұзартылды. Мердігер мекемелер әкімдікті тапсыруды жоспарланған мерзімнен шегеруге мәжбүр, деп хабарлайды 7kun.kz.

Қазақ құрылыс және сәулет ғылыми-зерттеу және жобалау институтының мамандары толықтай өртенген ғимаратты тексеріп, оны қалпына келтіруге шамамен 5 ай уақыт кететінін айтқан.

Алайда кейін қалпына келтіру жұмыстары ойлаған уақыттан көп мерзімге созылатыны айтылды. Себебі ғимараттың келбетін толықтай қалпына келтіру туралы шешім қабылданды. Осы себептерге байланысты жобалау-сметалық құжаттамасын дайындау мерзімі созылды.

«Әкімдікті қалпына келтіреміз. Алғаш рет алматылық бес компания кірген консорциум құрдық. Компаниялар біздің ғимаратты жөндеу жұмыстарымен айналысады. Біз жұмысты жыл соңына дейін аяқтауды жоспарлаған едік. Алайда жобалау туралы шешімдердегі қиыншылықтарға байланысты жұмыстар келесі жылдың Наурыз мейрамына дейін жалғасады», – деді Алматы қаласының әкімі Ерболат Досаев.

Сондай-ақ қала ғимарат алдындағы алаңның орнына саябақ салу жоспары да атап өтілді. Бүгінде ғимараттан жанып кеткен тастар мен мәрмәр қаптамалар толығымен алынды. Қазіргі уақытта жұмыс жалғасып, құрылымды сейсмикалық күшейту жүргізілуде.