Алматы. 10 сәуір. 7kun.kz - Кеше «Sulpak Cinema» компаниясы және Cinemax кинотеатрлар желісі прокатқа сәуірдің 12-сінде шығатын отандық «Қараман» тылсым триллерінің алдын ала жабық көрсетілімін өткізді.
Шытырман оқиғалы триллер Alan Cinema Production компаниясының алғашқы жобасы. Кинотуынды тауда болған тылсым оқиғаны баяндайды.
Қараман - тауда жасырылған алтын мүсіншені табуға аттанған көне жәдігерлерді іздеумен айналысатын бес адамнан тұратын команданың хикаясы.
Кейіпкерлер жолай жергілікті қорықшыны жолықтырып, оның көмегіне жүгінеді. Осылайша қорықшы олардың жол бастаушысына айналады. Бірақ ол жерде көне құпия жасырылған болып шығады. Өліммен бетпе-бет келетіндерін білмеген кейіпкерлерге аса сақ болу қажет: олар алтын іздейміз деп жүріп, тұзаққа түсіп қалулары мүмкін.
Фильм идеясының авторы - Марат Абдуллаев. Сценарий авторлары - Мейірмани Нұрлыбек пен Тимур Жақсылықов. Атқарушы продюсерлер - Ришат Әділбеков және Айдай Жамбоева. Жобаның бас продюсері - Мұрат Бекмұратов. Қоюшы-операторы - Қазбек Әмержанов, композиторы - Әбілқайыр Жарасқан, режиссеры - Дәстен Шәкіров.
Рөлдерді сомдағандар: Марат Абдуллаев, Дәстен Шәкіров, Мұрат Бекмұратов, Асан Мәжит, Марат Абай-Ділда, Ержан Нүсіпақынов, Филип Волошин, Мақсат Жақып, Райхан Айтқожанова және Жұлдыз Сапарғалиева.
Продюсерлер фильм түсірілімі туралы алғаш рет 2016 жылы сөз қозғаған. Сынамалы нұсқасының түсірілімі 2016 жылы күзде болған. 2017 жылы топ толықтырылған сценариймен және өзгертілген актерлік құраммен қайтадан түсірілімге кірісті.
Екінші түсірілім де 2017 жылы күзде басталды. «Қараман» Түрген, Ассы және Қайыңды шоқыларында түсірілді.
Авторлардың айтуынша, фильм 16 жастан асқан көрермендерге арналған.Похожие материалы
