Алматы. 26 ақпан. 7kun.kz – Эльдар Жұмағазиевтің айтуынша Ерболат Досаевтың Ұлттық банкке келуін кәсіпкерлер жақсы қарсы алды. Бұл туралы Қазақпарат хабарлады.

"Соңғы кездегі ішкі өнімдегі несиенің үлесі азайған еді. Осыған байланысты Ерболат Досаевтың Ұлттық банкке келуін кәсіпкерлер жақсы қарсы алып жатыр. Себебі, соңғы кездері оны біз экономикаға жауап берген вице-премьер ретінде көрдік. Қоян-қолтық жұмыс атқардық. Үмітіміз зор", - деді Эльдар Жұмағазиев Астанада «Мемлекет басшысы Жолдауында, Бес әлеуметтік бастамада атап өткен тапсырмаларды іске асыру аясында экономикалық өсімнің жаңа үлгісін қалыптастыру, халықтың кірістерін және өмір сүру сапасын арттыру» тақырыбында өткен панельдік сессияда.

"Атамекен" ҰКП басқарма төрағасының орынбасары атап өткендей, жалпы заңды тұлғалардың үлесіне қарайтын болсақ, кәсіпкерлердің ішінде несиелік деңгей былтыр 4,6 пайызға төмендеп, қарапайым халықтың үлесі 16,8 пайызға өскен.

"Несие беруде елімізде кейбір мәселелер бар. Оны біз жасырмаймыз. Екінші жағынан, несие алатын мекемелер де өңірлерде көп емес. Елбасының тапсырмасы бойынша экспортқа бағытталған компанияларға 600 млрд теңге берілгелі отыр. Шыны керек, экпортқа шығаруға мүмкіндігі бар компанияларды қазіргі уақытта іздеп жатырмыз", - дейді Эльдар Жұмағазиев.

Оның айтуына қарағанда, шикізатты өңдеп, экспортқа шығаруға қауқарлы компаниялар іздестірілуде.

"Ол мәселені Үкіметтің кеңейтілген отырысында Президент те көтеріп, ол санатта қанша компания бар екенін сұраған еді. 30-ға тарта компанияға диагностика жасалды. Экспортқа әлеуеті бар компаниялар белгілі бір мәселені айтады: ең біріншісі әрі ірісі - курс бойынша айырмашылық. Біздің көптеген компаниялар экспортқа өнім шығаруға қауқарлы болса да, шикізатты көбіне-көп Ресейден алады. Ал Ресейдегі ақшаның курсы өсіп кетер болса, шикізаттың бағасы да шарықтайды. Екіншіден, қарыз алу бойынша банктің пайыздары. Айналымдағы капиталды қаржыландырудың өткір қажеттілігі бар. Өндірісті арттыру бағытында инвестиция қажет болып жатады", - дейді ол.

Эльдар Жұмағазиев өз сөзінде кейде кәсіпкерлердің қарапайым тілмен айтқанда білімдері де жетіспей жататынын айтып өтті.

"Белгілі бір компанияның қаржылық ахуалына талдау жасар болсақ, сол мекемені басқарып отырған басшысының өзінің білім деңгейі жетіспейтінін көреміз. Соған байланысты біз ұсыныс беріп, ортаңқол кәсіпкерлерді оқытуға шақырамыз. Оқыту мүмкіндіктерін қарастырып жатырмыз", - деді "Атамекен" ҰКП басқарма төрағасының орынбасары.