Әлеуметтік желі қолданушылары Жеңістің 70 жылдығы мерекесі қарсаңында соғыс тақырыбына арналған отандық фильмдерді көре алмағандарына наразы.

"2015 жылы соғыстың 70 жылдығы екені биыл ғана белгілі болған жоқ. Онда неге 9 мамырда қазақ киносын көре алмадық? Ақан Сатаев соғыс туралы кино түсіріп жатыр деп “жұбатқандай” болды. Естуімізше, Тәуелсіздік күні қарсаңында шығады екен. Ал мұндай фильмдер неге ертерек жоспарланбайды? Қазір кинотеатрға барыңызшы, соғыс тақырыбындағы бірде бір отандық фильм жоқ.Есесіне қайта түсірілген “А зори здесь тихие”, Людмила Павлюченко туралы “Битва за Севастополь”, Сергей Попов дегенрежиссердің “Дорога на Берлин” деген фильмдері жүріп жатыр. Теледидарды қоссаңыз да ресейлік, қала берді кешегі кеңестік фильмдер. Әрине, бәрінде әлемді фашистерден тазартқан баяғыдай қаһарман да батыл орыс халқы туралы айтылады. Ал қазақтар не істеді сонда?", деп жазады журналист фейсбуктегі парақшасында. 

Журналистің жазуынша 1967 жылғы Мәжит Бегалиннің «За нами Москва» кейін әзірге ауыз толтырып айтатын соғыс туралы картина жоқ екен. Әлеуметтік желі қолданушыларының пікірлерінен кейін телеарналардың бағдарламаларын шолып шыққан едік. Бұл тақырыпқа жақында түсірілген бір ғана отандық фильмді байқадық. КТК телеарнасының эфирінен Ермек Тұрсынов пен Виктор Климовтің Т.Бигелдинов пен басқа да ұшқыштардың шығармалары негізінде түсірген "Жоғары құлау" фильмі ғана шығуда екен. 8 сериядан тұратын фильмді авторлары Kaspi Bank-тің қолдауымен түсіріпті. Басқа телеарналардың эфирінен отандық фильмдерді таппаған соң, ресейлік кино әлеміне көз жүгірткенбіз. Бұл істе ҚР Мәдениет министрлігі мен "Қазақфильм" АҚ немесе басқа де жеке компаниялар  ресейлік әріптестерінен үлге алса болады екен. Жеңістің 70 жылдығына орай көршілерімізде Мәдениет министрлігінің қолдауымен соғыс тақырыбына арналған 7 фильм жарыққа шығыпты. Бұлардың жалпы бюджеті 1 млрд. рубльге жақын. Мысалы: бюджеті туралы ашық ақпарат бар 6 фильмнің түсіріліміне ғана 894 млн.рубль жұмсалған.  Бұл туралы rbc.ru жазды.