Алматы. 04 желтоқсан. 7kun.kz — 2020-2022 жылдарға арналған республикалық бюджет жобасында "Назарбаев старты" (бұрынғы "Бәйтерек") ғарыш зымыран кешенін құруға 45,7 млрд теңге бөлінеді.

Қаражат цифрлық даму, инновация және аэроғарыш өнеркәсібі министрлігіне бөлінеді. 2020 жылы бұл мақсатқа 2,7 млрд теңге, 2021 жылы - 22,1 млрд теңге, ал 2022 жылы 20,8 млрд теңге жоспарланған.

Бұдан басқа, ведомство KazSat-2R ғарыштық байланыс жүйесін құру және пайдалануға беру үшін Республикалық ғарыштық байланыс орталығының жарғылық капиталын ұлғайтуға 38 млрд теңге алады.

Бұл спутник KazSat-2-ні алмастырады және "Цифрлық Қазақстан" бағдарламасы шеңберінде спутниктік байланыстың тіркелген арналарын ұйымдастыру үшін іске қосылады.

2020 жылы "Республикалық ғарыштық байланыс орталығы" 8 млрд теңге, ал 2021 және 2022 жылдары тағы 15 млрд теңгеден алады.