Алматы. 4 қаңтар. 7kun.kz – Оқу-ағарту министрі лауазымынан босатылған Асхат Аймағамбетов ведомство басшылығындағы өз жұмысын қорытындылап, қазақстандықтарға алғыс білдірді, деп хабарлайды 7kun.kz.

Қоштасу жазбасы оның Telegram-арнасында пайда болды.

Бұрынғы министр бұл лауазымды 2019 жылдың маусымында алғанын және үш рет қайта тағайындалғанын атап өтті.

«Осы уақыт ішінде маған жүктелген сенімді ақтауға және ашық болуға, жұмыста тиімді әрі пайдалы болуға тырыстым. Президенттің, мұғалімдердің, ата-аналардың, министрліктің бүкіл ұжымының, азаматтық қоғамның қолдауының арқасында маңызды нәтижелерге қол жеткіздік», – деді ол.

Аймағамбетовтың айтуынша, ол үшін уақыт талабына сай реформаларды енгізіп қана қоймай, сабақтастықты сақтау маңызды болды.

«Әсіресе пандемия кезінде қиын болды, бірақ әріптестеріміздің түсінігі мен қолдауының арқасында ол уақыттан да өттік», – деді экс-министр.

Ол «Педагог мәртебесі туралы» заңның қабылданғанын еске салды, соның арқасында түбегейлі өзгерістер орын алды. Соның ішінде жалақыны көтеру, қосымша төлемдер, міндетке жатпайтын қызметтерден босату, бес күндік жұмыс аптасына ауысу, 30 жыл еңбек өтілі бар мұғалімдерді ҰБТ-дан босату және 25 жылдан астам жұмыс өтілі бар мұғалімдерге төсбелгі тағайындау және т.б.

«Енгізілген жаңалықтарға түсіністікпен қараған ата-аналарға алғысымды білдіргім келеді. Қандай да бір бастаманы жүзеге асырғанда балаларымыздың мүдделерін негізге алдық. Осыған дейін де балаларымның мемлекеттік мектеп пен балабақшаға баратынын бірнеше рет айтқан болатынмын», – деп жазды Аймағамбетов.

Ол балабақша тәрбиешілеріне, колледж мұғалімдері мен университет оқытушыларына да қолайлы жағдай жасауға тырысқанын атап өтті.

Экс-министр Оқу-ағарту министрлігінің, ведомстволық бағынысты ұйымдардың, департаменттердің, білім басқармаларының, әдістемелік кабинеттердің, білім беру ұйымдарының барлық қызметкеріне ерекше алғысын айтты.

«Сіздер бағалауға келмейтін ауқымды жұмыс атқардыңыздар. Кейде тым қатал, талапшыл болатынымды білемін. Ашық сөйлеп, қолдау білдіріп, сын айтқан қоғам қайраткерлері мен белсенділерге алғыс айтамын. Мен әрқашан сындарлы ескертулерді қабылдауға дайынмын және оларды түзетуге тырысамын», – деді ол.

Аймағамбетов атқарған қызметінде осы саланың дамуына үлес қосып, қазақстандықтар мен президенттің сенімін ақтай алғанына үміттенетінін жеткізді.