Алматы. 1 шілде. 7kun.kz — 2019 жылғы қаңтар-сәуірде әлеуметтік қамтамасыз ету шығындары 996,9 млрд теңгені немесе мемлекет шығыстарының жалпы санының 25,6%-ын құрады - бұл санаттар арасындағы ең жоғарғы көрсеткіш. Бұл деректерді ҚР Қаржы министрлігінің статистикалық мәліметтері дәлелдейді.

2019 жылы денсаулық сақтау шығындары 12,2% құрайды. Халықтың денсаулығын сақтауға, сондай-ақ кең бейінді ауруханаларға және әскери күштерді медициналық қамтамасыз етуге ағымдағы жылдың қаңтар-сәуір айларында 475,6 млрд теңге жұмсалды.

Білім беруге жұмсалатын шығыстардың өсуі байқалады. 2019 жылдың бірінші тоқсанында білім беруге 197 млрд теңге бөлінді. Бұл ағымдағы бюджет шығынының 5%-ын құрайды.

Сондай-ақ, қорғаныс және әскери мұқтаждықтарға арналған шығыстардың ұлғаю үрдісі жүріп жатыр: 2017 жылы шығындар жалпы шығыстар сомасының 3,7%-ын құраса, 2019 жылы 5,3%-ға дейін ұлғайып, 207,5 млрд теңгені құрады.

Бюджеттен ең аз қаражат "Қоғамдық тәртіп, қауіпсіздік, құқықтық, сот, қылмыстық-атқару қызметі" санатына бөлінді. Ағымдағы жылдың 1 мамырындағы жағдай бойынша шығыстар сомасы 184,6 млрд теңгені құрап, үлестік қатынаста 2018 жылғы 6,4%-дан 4,7%-ға дейін қысқарған.

Мемлекеттік қызметтерді ұсынуға 175,1 млрд теңге кетті, бұл үлестік қатынаста 4,5%-ды құрайды. Көлік және коммуникацияға 110,1 млрд теңге бөлінді - 2,8%.

Сонымен қатар, жол жөндеу (67,9 млрд теңге), ауыл шаруашылығы және қоршаған ортаны қорғау (67,5 млрд теңге), ТКШ (53,1 млрд теңге) шығындардың негізгі санаттары болды. Ал мәдениет, спорт және туризм (34,7 млрд теңге), сыртқы саяси қызмет (48,8 млрд теңге), қаржы қызметі (26 млрд теңге), ЖЭК (22,2 млрд теңге), өнеркәсіп (2,9 млрд теңге) және ғылыми зерттеулер (915,7 млрд теңге) санаттарына бөлінген шығындардың көлемі салыстырмалы түрде аз.

2019 жылдың бірінші тоқсанында сыртқы борышқа қызмет көрсету 251,6 млрд теңгені құрады.