Шымкент. 2 қараша. 7kun.kz - Міндетті зейнетақы жарналары бойынша салымшылардың шоттарының саны 2017 жылдың 1 қазанында 1 млн 3 мыңды құрады. Облыс салымшыларының зейнетақы жинақтары жылдың басынан 13,4 пайызға өсіп,  501,6 млрд теңгеге ұлғайды. Бүгін бұл туралы ОҚО өңірлік коммуникациялар қызметінде өткен брифингте «ҚР ұлттық банкі» РММ ОҚ филиалының директоры Әнуар Ботанбеков мәлім етті, деп хабарлайды ОҚО әкімінің баспасөз қызметі.

Әнуар Амангелдіұлының айтуынша, Оңтүстік Қазақстан облысының сыртқы сауда айналымы 2017 жылдың қаңтар-тамызында 1,9 млрд АҚШ долларын құраған. Соның ішінде экспорт - 720,6 млн АҚШ доллары, ал импорт - 1 134,4 млн АҚШ долларына жеткен.

«2017 жылдың 9 айында Ұлттық Банктің алтын валюталық резервтері 10,2 пайызға дейін өсті. Ал ұлттық қордың шетел валютасындағы активтері 56,8 млрд АҚШ долларын құрады. Сондай-ақ, Қазақстанның сыртқы қарызы бірінші жартыжылдықта 4,2 млрд долларға өсіп, 167,9 млрд долларға жетті. Сонымен қатар, банктердің кредит беру белсенділігін арттыру жалғасып келеді. Мәселен, жылдың басынан банктердің облыстағы кредиттерінің көлемі  4,8 пайызға ұлғайды», - деді Әнуар Ботанбеков.

Бұдан бөлек, Оңтүстік Қазақстан облысында жинақталған инфляция деңгейі 9 айда 4,8 пайызды құраған.  Бұл өткен жылғы көрсеткіштен 6,4 пайызға төмен болып отыр.