Алматы. 23 тамыз. 7kun.kz – Франция Қазақстанның стратегиялық серіктесі болып қала береді. Соңғы 10 жылда Қазақстан экономикасына француздық капитал салымының көлемі 11 млрд доллардан асты, - деп хабарлайды Energy Prom.

2019 жылдың бірінші жартыжылдығында елдер арасындағы тауар айналымы 2,3 млрд долларға жетті. Тауар айналымындағы негізгі үлес қазақстандық тауарлардың Францияға экспортына тиесілі – 87,9% немесе 2 млрд доллар. Француз тауарлары мен қызметтерінің импорты 272,1 млн долларды немесе тауар айналымы көлемінің 12,1%-ын құрады.

Осы жылдың шілде айының соңында елде француз капиталының қатысуымен 112 кәсіпорын жұмыс істеді, оның ішінде «Тоталь», «Орано», «Данон», «Викат», «Пежо», «Альстом».

Франция Қазақстанның ірі шетелдік инвесторларының бестігіне кіреді. 2019 жылдың наурыз айының соңында Қазақстанға инвестиция көлемі 13,8 млрд долларды құрады. Француздар үшін инвестиция салуға тау-кен саласы – 97% немесе 13,4 млрд доллар, көлік және қоймалау (163,9 млн доллар) және көтерме және бөлшек сауда, автокөліктер мен мотоциклдерді жөндеу (104,4 млн доллар) қызықты болды. Осы үш сала осы елдің ең көп инвестицияларын шоғырландырды.

2019 жылдың бірінші тоқсанында Франциядан Қазақстанға тартылған тікелей инвестициялардың жалпы ағыны 255,7 миллион долларды құрады.