Алматы. 4 наурыз. 7kun.kz – Қазақстан Ираннан тірі құс, құс етін және инкубациялық жұмыртқаларды әкелуге уақытша тыйым салды. Бұл туралы Дүниежүзілік сауда ұйымының (ДСҰ) сайтында хабарланды.

Бұл шара Қазақстан аумағына термоөңдеуден өтпеген (кемінде 70°С) тірі құстарды және инкубациялық жұмыртқаларды, мамық пен қауырсындарды, құс етін және құс шаруашылығы өнімдерінің барлық түрлерін, таксидермиялық өңдеуге ұшырамаған құстарға арналған жемшөп пен жемшөп қоспаларын, сондай-ақ Ираннан құстарды ұстауға, союға және бөлшектеуге арналған пайдаланылған жабдықтарды әкелуге уақытша шектеу болып табылады.

Уақытша тыйым салудың себебі - Иран аумағында құс тұмауының өршуі.

Құжатқа сәйкес, тыйым 2019 жылдың 23 қаңтарында күшіне енді. Бұл ретте тыйым салудың аяқталу мерзімі көрсетілмеген.