Алматы. 7 қараша. 7kun.kz - Денсаулық сақтау министрі Елжан Біртанов Парламент Мәжілісінің Спикері Нұрлан Нығматулиннің сұрағына жауап бере отырып, Қазақстан нарығы үшін дәрілік заттарды іріктеу кезеңдері туралы айтты. «Мәселе дәрі-дәрмектер жайлы болып отыр. Сіз жарнаманы қараңыз, пайдасыз дәрілер шығарылады. Медициналық мекемелерге келетін біздің байғұс науқастарды фармакологиялық компаниялармен байланысы бар дәрігерлер әуре қылады. Мәселе осында жатыр. Дәрі-дәрмектер бойынша шешімді қабылдап, оны ұсынатын, бекітетін және ауруларды емдеу үшін қолданысқа енгізетін кім екенін атап көрсетіңізші, ел хабардар болсын. Қандай комиссия?» - деп Денсаулық сақтау министрлігіне Нұрлан Нығматулин сұрақ қойды. Елжан Біртанов өз кезегінде Қазақстан нарығына дәрі-дәрмектерді жіберу мәселесіне денсаулық сақтау министрлігінің Фармация комитеті жауап беретінін хабарлады. Бұл ретте дәрілік заттарды сараптау ұлттық орталығы алдын ала барлық зерттеулерді, сапа, тиімділік дәлелдемелерін жүргізеді. «Егер бұл дәрілер әлемде қолданылса, бірақ Қазақстанға алғаш рет енгізілсе, тиісті құжаттардың барлық спектрін ұсыну қажет. Осылайша, дәрі-дәрмектер тіркелген тізімге түседі. Дәрі-дәрмекті хаттамаларға енгізу туралы шешімнің екінші кезеңінде профильді қауымдастықтар, мысалы, онкологтар немесе кардиологтар қабылдайды. Осыдан кейін, егер хаттамаларда оң шешім қабылданса, онда сапа жөніндегі бірлескен комиссия қарап шығады, оны денсаулық сақтау вице-министрі басқарады», - деп жауап берді Елжан Біртанов.