Алматы. 22 сәуір. 7kun.kz — Қазақстан Республикасы мен Оңтүстік Корея республикасы арасындағы тауар айналымы 4 млрд долларға жетті. Бұл туралы Қасым-Жомарт Тоқаев айтты.

Нұр-Сұлтан қаласына мемлекеттік сапармен Корея Республикасының президенті Мун Чжэ Ин келді. Ол Қазақстан басшысымен кездесіп, бірқатар мәселелерді талқылады.

«Біз банктер мен қаржы институттарының өзара іс-қимылын жандандыру туралы мәселені қарастырдық, бұл инвестициялық жобаларды іске асыруда шағын және орта бизнестің мүмкіндіктерін ынталандыруға мүмкіндік береді. Осы тұрғыда мен Орталық Азия нарығына шығуға осы өңірлік алаңды пайдалану үшін АӨҚО алаңында Кореяның қаржы институттары мен іскер топтарының қызметін жандандыруға ұсыныс жасадым», - деді Қ. Тоқаев.

Қазақстан президентінің айтуынша, бүгінде елдер арасында барлық бағыттар бойынша өзара іс-қимыл жолға қойылған. Сауда-экономикалық ынтымақтастық жөніндегі үкіметаралық комиссия, іскерлік кеңес, екі елдің азаматтары үшін визасыз режим жұмыс істейді.

«Өткен жылдың қорытындысы бойынша тауар айналымының өсімі рекордтық 4 млрд долларға жетті. Корей бизнесі Қазақстанның азық-түлік, тау - кен байыту, автомобиль және басқа салаларында табысты жұмыс істеуде», - деді Қасым-Жомарт Тоқаев.