Алматы. 27 қаңтар. 7kun.kz — Қытайдың ауруларды бақылау және алдын-алу орталығының мамандары сарапшылары Ухандағы теңіз өнімдері базарынан жаңа коронавирустың ізін тапты. Бұл туралы орталық мамандарына сілтеме жасап China Daily хабарлады.

Олар 585 үлгі жинап, оның 33-і вирусқа оң нәтиже көрсетті. Оларды 22 дүңгіршектен және қоқыс таситын арбалардан алған, көпшілігі базардың батыс бөлігінде болған.

Орталықтың мәліметтері бойынша, дәл осы жерде жабайы жануарлар сатылған. Мамандар олардың вирустың көзі екенін растады, бірақ бастапқыда қандай жануар жұқтырғаны белгісіз. Орталық жаңа коронавирустың Чжэцзян провинциясының Чжошуан қаласындағы ұшатын тышқандардан табылған вирусқа 90%-ға ұқсас екенін айтты.

Алайда South China Morning Post хабарлауынша, Ухандағы ауруханада жұмыс істейтін қытай ғалымдары коронавирустың жаңа түрін бірінші болып жұқтырғандар теңіз өнімдері базарына бармағанын анықтаған. Олардың мәліметтеріне сәйкес, жаңа аурудың белгілері алғаш рет 1 желтоқсанда белгілі болды. Зерттеушілердің айтуынша, ауру жұқтырған адамның отбасы мүшелерінің ешқайсының қызуы көтерілмеген және респираторлық симптомдардың жоғарылауы болмаған.

Қытайдың Денсаулық сақтау ісі жөніндегі мемлекеттік комитетінің басшысы Ма Сяовэй жаңа коронавирустың инкубациялық кезеңі бір күннен 14 күнге дейін құрайтынын айтты,деп хабарлайды CGTN. Оның сөзінше, осы кезеңде вирусты жұқтыруға болады.

Айта кетейік, коронавирустың өршуі 2019 жылдың желтоқсанында Қытайдың Ухань қаласында басталды. Жұқтырғандар жергілікті теңіз өнімдері базарында жұмыс істеді. Содан кейін ауру жағдайлары ҚХР-ның басқа қалаларында тіркелген.