Тараз. 11 шілде. 7kun.kz – Тараздағы ауаны химиялық ластау көзі «Қазфосфат» зауыты болып шықты, деп хабарлайды 7kun.kz.

«Бүгін сағат 20.00-де «Қазфосфат» ЖШС минералды тыңайтқыштар зауытында (ЗМУ) апат болды. Алдын ала жүргізілген талдаулардың нәтижесі бойынша фтор қосылыстарының шамалы жоғарылағаны байқалады. Қазіргі уақытта қаланың санитарлық шекарасында азот сияқты басқа заттардың асып кетуі анықталған жоқ. Облыс әкімінің тапсырмасымен экологтар, төтенше жағдайлар департаментінің мамандары және басқа да жауапты тұлғалардан жұмыс тобы құрылды. Жұмыс тобын Жамбыл облысы әкімінің орынбасары Рүстем Дәулет басқарады. Қазір өзге аумақтарда өлшеу жұмыстары жалғасуда», – деп хабарлады Жамбыл облысының әкімдігі.

Бұған дейін Тараз тұрғындарының ащы түтінге қатысты шағымдарынан кейін Экология, геология және табиғи ресурстар министрлігі қала атмосферасының азот диоксидімен және күкіртті сутегімен ластануының жоғарылағаны айтылған.

Айта кетейік, Мәжілістің экс-спикері Нұрлан Нығматулиннің ұлдары басқаратын «Қазфосфат» минералды тыңайтқыштар шығаратын зауыттың бағасына қатысты материалдар қылмыстық іс қозғау үшін Қаржы мониторингі агенттігіне (ҚБМ) жіберілгені хабарланған болатын.