2018 жылдан бастап 414 пара беру фактісі тіркелді

аудандық
Фото: tengrinews.kz

Алматы. 4 шілде. 7kun.kz — 2018 жылдан бастап 2019 жылдың мамыр айына дейін Сыбайлас жемқорлыққа қарсы іс-қимыл агенттігі 414 пара беру фактісін тіркеді. Бұл туралы ведомствода хабарлады.

Ақпаратқа сәйкес, 328 адам қылмыстық жауапкершілікке тартылып, оның 196-і сотталған. Сотталғандардың 37-і бас бостандығынан айыру, 27-і бас бостандығын шектеу жазасына кесілді, 132-іне айыппұл салынды.

«Талдау көрсеткендей, ең көп пара алатындар — жеке компаниялардың өкілдері, олар лауазымды тұлғаларды сатып алу арқылы кәсіпкерлік қызметті қолайлы жүзеге асыру немесе мемлекеттік сатып алу шарттары бойынша орындалған жұмыстар актілеріне кедергісіз қол қою мәселелерін шешеді. Мысалы, 2019 жылдың маусым айында «Қазақжолқұрылыс» ЖШС директоры З. Дощановқа 30 млн теңге көлемінде айыппұл салынды, ол «Алматыжолзертхана» РММ директорына 2 млн теңге көлемінде пара беріп, жол құрылысы кезінде қажетті заттарды арзан материалдарға өзгертуге келіскен. Сотталушы өмір бойы мемлекеттік қызметте және жергілікті өзін-өзі басқару органдарында қызмет атқару құқығынан айырылды», — делінген хабарламада.

Сондай-ақ, «Noda med» ЖШС директоры Н. Құдабаев 6 айға бас бостандығынан айырылды. Ал «Дез Сервис KZ» ЖШС директоры Омаров Б. мемлекеттік сатып алу шарттарын жасасу кезінде жалпы қамқорлық көрсеткені үшін Қостанай облыстық онкологиялық диспансерінің бас дәрігеріне пара бергені үшін 360 мың теңге мөлшерінде айыппұл төлейді.

«Сонымен қатар, өз басшыларына қызметке тағайындалғаны және жоғарылағаны үшін қол астындағылардың пара беру фактісі бар. Осылайша, Нұр-Сұлтан қаласының Сыбайлас жемқорлыққа қарсы қызметі «Ақтекеби мемлекеттік сорт сынау учаскесі» ММ-нің меңгерушісі М. Жақсыбаевқа қатысты қылмыстық істі сотқа жолдады. Айыпталушы Ауыл шаруашылығы министрлігінің «Ауыл шаруашылығы дақылдарының сорттарын сынау жөніндегі мемлекеттік комиссия» ММ-нің төрағасы М. Куйшеновке жоғары лауазымға тағайындалғаны үшін пара берді. 2018 жылдың 27 наурызында Сарыарқа ауданының № 2 аудандық сотының үкімімен Күйшенов пен Жақсыбаевке тиісінше 24 және 12 млн теңге көлемінде айыппұл салынды», — делінген хабарламада.

Бұданн басқа, тұрмыстық сыбайлас жемқорлық көріністері толық жойылмаған.

«Бұл бағытта Агенттік тұрмыстық сыбайлас жемқорлықты жоюға, сыбайлас жемқорлықты жалпыға бірдей қабылдамауды қалыптастыруға, азаматтардың мемлекеттік билік институттарына сенімін арттыруға бағытталған жүйелі алдын алу жұмыстарын жүргізуде. Қойылған мақсаттарға қол жеткізу үшін мемлекеттік аппараттың азаматтармен өзара қарым-қатынасы «клиентке бағдарлану», қызмет алудың ашықтығы мен қолжетімділігі қағидаттарында құрылуы тиіс. Бүгінде мемлекеттік қызметтерді көрсету тәртібін реттейтін барлық нормативтік құқықтық база бар, «электрондық үкімет» порталы жұмыс істейді, Ұлт жоспарының 100 қадамын іске асыру шеңберінде бір жерде барлық қызметтерді көрсетудің бірыңғай провайдері ретінде «Азаматтарға арналған үкімет» мемлекеттік корпорациясы құрылды, тізілімді кеңейту, мемлекеттік қызметтерді оңтайландыру және кейіннен автоматтандыру бойынша кезең-кезеңмен жұмыс жүргізіліп жатыр. Агенттік осы бағыттағы жұмысты жалғастырады», — деп атап өтті ведомствода.

Хабарламада айтылғандай, еліміздің сыбайлас жемқорлыққа қарсы саясаты сыбайлас жемқорлыққа қарсы негізгі білім беру, алдын алу және жазалауды ұтымды ұштастырып, жүзеге асырылуда.

«Мемлекет сыбайлас жемқорлық қылмыстары үшін қылмыстық қудалау институттарын әлсіретуге ниетті емес. Заңға қайшы әрекеттер үшін жазалаудың бұлтартпастығы — бұл тек заңдылықтың маңызды принципі ғана емес, сонымен қатар әлеуметтік әділеттілікті қамтамасыз ету көрсеткіші», — деді Сыбайлас жемқорлыққа қарсы іс-қимыл агенттінде.