Алматы. 27 қаңтар. 7kun.kz — Қазақстандық жұмыс берушілер өз қызметкерлеріне 1,4 млрд теңгеден астам қаржы бөлуі тиіс. Бұл туралы Еңбек және халықты әлеуметтік қорғау министрлігінде хабарлады.

Министрліктің мәлімдеуінше, 108 кәсіпорындағы 4 мың жұмысшы төлемдерді күтіп отыр.

«2020 жылғы 1 қаңтардағы жағдай бойынша елдің 108 кәсіпорнында 4 мың жұмыскерге жалақы бойынша берешек 1,4 млрд теңгені құрады. Бұл ретте 2019 жылы жергілікті еңбек инспекцияларының көмегімен қызметкерлерге 5,42 млрд теңге төленді, осылайша 41 мыңнан астам қызметкердің құқықтары қорғалды", – деді ведомствода.

Жалпы қарыздың 174 млн теңгесі - бұл қазіргі уақытқа дейін төленбеген, тоғыз кәсіпорындағы 1 мың жұмыскерге үш айға дейін кешіктірілген сома; 446 млн теңге – 1,8 мың қызметкердің алдындағы 35 кәсіпорынның үш айдан астам мерзімі өткен берешегі. Бұдан басқа, 800 млн теңге – бұл банкротқа ұшыраған 64 кәсіпорындардағы төленбеген жалақы. Өз төлемдерін 1,8 мың қызметкер күтіп отыр. Министрлік жұмыс істемейтін кәсіпорындарда төлем жасау мерзімі екі-үш жылға дейін жету мүмкіндігін атап өтті.

«Жалақы бойынша берешекті азайту үшін облыстардың, Нұр-Сұлтан, Алматы және Шымкент әкімдіктері 2020 жылдың басынан бастап дағдарысқа қарсы штабтар мен әлеуметтік әріптестік жөніндегі өңірлік комиссиялардың 130-дан астам отырысын өткізді, онда еңбекақы бойынша берешегі бар 1,3 мыңнан астам жұмыс беруші тыңдалды", - деп хабарлады Еңбек министрлігінде.

Банкроттыққа ұшыраған кәсіпорындарда жалақы бойынша жалақы берешегін өтеу шараларын конкурстық басқарушылар "Оңалту және банкроттық туралы" заң шеңберінде қабылдайды.