Алматы. 2 тамыз. 7kun.kz — Қазақстан Премьер-министрі Асқар Мамин Арыс қаласына барып, қаланы қалпына келтіру мерзімін 20 тамызға дейін созды. Бұл туралы Facebook-те Түркістан облысы әкімінің кеңесшісі Сәкен Қалқаманов хабарлады.

Оның айтуынша, құрылыс жұмыстарының 90% аяқталды. Премьер-министр қалған нысандарды жөндеуді аяқтауды тапсырды.

"7 мың 201 үйдің 6 мың 611-і жөнделді. 416 үй қайта тұрғызылуда. Бұзу немесе жөндеу бойынша шешімді Қазақ Құрылыс және сәулет ҒЗИ мамандары қабылдайды", – деді ол.

Сондай-ақ, ол Арыс қаласының 55,5 мың тұрғыны жақын күндері 100 мың теңге көлемінде өтемақы алатынын хабарлады.

Бұған дейін хабарланғандай, жөндеу жұмыстарын 1 тамызға дейін аяқтау жоспарланған.

Премьер-Министрдің баспасөз қызметі барлық инженерлік инфрақұрылымды жөндеу толық аяқталғанын хабарлады. Көшелерге ауқымды жөндеу жұмыстары жүргізілді. 62 әлеуметтік нысан, оның ішінде ауруханалар, мектептер, балабақшалар, спорт нысандары 20 тамызға дейін дайын болады.

"Арысты қалпына келтіруге еліміздің барлық аймақтары, ұлттық компаниялар, ірі бизнес өкілдері белсенді қатысты. Бір ай ішінде үлкен жұмыс жүргізілді, 10 мыңнан астам құрылысшы қаланы қалпына келтіруге қатысты", — деді Асқар Мамин.

Премьер-министр Қорғаныс министрлігіне қару-жарақты қоймалардан шығаруды қамтамасыз етуді, Түркістан облысының әкімдігімен бірлесіп әскери қалашықта тұратын 58 азаматтық отбасының тұрғын үй мәселелерін пысықтауды тапсырды.