Нұр-Сұлтан. 3 маусым. 7kun.kz – 2022 жылдың 1 маусымындағы жағдай бойынша, 5679 адам қандас мәртебесін алған, деп хабарлайды 7kun.kz.

Еңбек және халықты әлеуметтік қорғау министрлігінің мәліметінше, жыл басынан бері Қазақстанға, тарихи отанына оралғандардың ең көбі Өзбекстаннан. 1991 жылдан бастап республикаға барлығы 1 млн 93,5 мың этникалық қазақ оралды.

«Осы жылдың басынан бастап Қазақстанға келген қандастардың жартысынан астамы (68,7%) Өзбекстаннан, 10,4% – Қытайдан, 8,8% – Түркіменстаннан, 2,6% – Моңғолиядан және 9,5% - басқа елдерден келгендер» - деп жазылған министрлік таратқан ресми ақпаратта.

Келген этникалық қазақтар негізінен Алматы (31,1%), Маңғыстау (18,8%), Түркістан (10,3%) және Жамбыл (6,2%) облыстарына, сондай-ақ, Алматы (6%), Нұр-сұлтан (6,9%) және Шымкент (7,9%) қалаларына қоныстанған.

Осы жылдың 1 маусымындағы жағдай бойынша қоныс аударғандардың еңбекке қабілеттілер үлесі 63,2%-ды, еңбекке қабілетті жасқа жетпегені 22,8%-ын және зейнеткерлер 14%-ды құрайды.