Алматы. 5 маусым. 7kun.kz – Білім беру және денсаулық сақтау саласының қызметкерлері үшін тұрғын үй сатып алуға 40 млрд теңге бөлінеді. Екі жыл ішінде Қазақстандық Ипотекалық компания сатып алу құқығымен жалға 3 мың пәтер бөледі. Бұл туралы ҚИК басқарма төрағасы Әділ Мұхамеджанов хабарлады.

Тұрғын үй алуға үміткерлердің тізімін министрліктер қалыптастыратын болады. Өз кезегінде ҚИК қатысушылардың төлем қабілеттілігін бағалауды жүргізеді және өтінімдері мақұлданатын үміткерлермен ұзақ мерзімді жалға алу шартын жасайды.

Қатысушылар үшін жалға берілетін тұрғын үйді сату шарттары:

• жалға алу мерзімі-20 жылға дейін;
• бастапқы жарнаның болмауы;
• кез келген уақытта айыппұл санкциясыз тұрғын үйді мерзімінен бұрын сатып алу мүмкіндігі;
• табыс жеткіліксіз болған жағдайда кепілдіктерді тарту мүмкіндігі.

ҚР Денсаулық сақтау министрі Елжан Біртанов тұрғын үйге барлық мамандықтағы медицина қызметкерлері үміткер бола алатынын атап өтті.

"Тек дәрігерлер ғана емес, сонымен қатар медбикелер де, емханаларда, ауруханаларда жұмыс істейтін басқа да білімі бар мамандар, яғни бухгалтерлер, инженерлер және т.б. Барлығы маңызды жұмыс атқарады. Мұнда білім беруге шектеу жоқ. Лауазым тұрғысынан басымдықтар жоқ. Ең алдымен, жұмыс өтілі, отбасы құрамы, жүйеге енгізілген жарналар негізінде қарастырылады", - деді министр.

ҚР Білім және ғылым министрлігінің жауапты хатшысы Арын Өрсариевтің айтуынша, негізгі талаптар соңғы бес жыл ішінде меншікте тұрғын үйдің болмауы, төлем қабілеттілігін растау - табыстары туралы анықтаманы алып келу болады.

"1 шаршы метр үшін 260 мың теңге болған жағдайда 50 шаршы метр пәтер шамамен 13 млн теңге тұрады. Егер жалға алу шарты 20 жылға жасалса, онда ай сайынғы төлем 60-70 мың теңгені, 15 жылға 80-90 мың теңгені құрайды", — деді ҚР Білім және ғылым министрлігінің өкілі.