Алматы. 11 қазан. 7kun.kz — 2018-2031 жылдар аралығында талшықты-оптикалық байланыс желілерін (ТОБЖ) салу жобасы бойынша 208,5 млрд теңгеден астам мемлекеттік міндеттемелер құрады. Бұл туралы Цифрлық даму, инновация және аэроғарыш өнеркәсібі министрлігінде хабарлады.

Ведомствоның хабарлауынша, 2018-2020 жылдары жоба аясында ауылдық елді мекендерді ТОБЖ технологиясы бойынша кеңжолақты қатынаумен қамтамасыз ету жоспарланып отыр.

"Қамтамасыз ету байланыс қызметтерін сатып алу арқылы мемлекеттік-жеке меншік серіктестік арқылы жүзеге асырылады. 2020 жылға дейін 1250 ауылдық елді мекенді (АЕМ) интернетке кең жолақты қолжетімділікпен қамтамасыз ету жоспарлануда. Оның ішінде 2018 жылы – 56 АЕМ, 2019 жылы – 685 АЕМ және 2020 жылы – 509 АЕМ", - деді министрлікте.

Сонымен қатар, министрлік бұл 3,7 мың мемлекеттік органдар мен бюджеттік ұйымдардың (МО/БО) жоғары жылдамдықты интернетке қол жеткізуіне мүмкіндік беретінін атап өтті. Оның ішінде 1 мың денсаулық сақтау нысаны мен 1,3 мың білім беру нысаны. Бұдан басқа, салынған инфрақұрылым ұялы операторлардың дамуын ынталандырады. ТОБЖ жалпы ұзындығы 20 мыңнан астам километрді құрайды.

2018 жылы ТОБЖ есебінен 56 ауылдық елді мекенде орналасқан 177 мемлекеттік мекеме интернетке қосылды. 2019 жылдың І жартыжылдығының қорытындысы бойынша 27 ауылда орналасқан 86 мекеме қосылды. 2019 жылдың соңына дейін 685 АЕМ-де орналасқан 2 мың мемлекеттік мекемені қосу жоспарланып отыр.

"Бұдан басқа, 2019-2021 жылдар аралығында "Халық саны 50 және одан жоғары ауылдық елді мекендерде LTE стандартының 4G ұялы байланыс желісінің және басқа технологиялардың құрылысы" жобасын іске асыру қамтамасыз етіледі. Бүгінгі таңда аталған жоба аясында Статистика комитетінің деректері мен жергілікті атқарушы органдардың түзетулерін ескере отырып, 50 және одан да көп тұрғыны бар ауылдардың қорытынды тізімін дайындау жұмыстары жүргізілді", - деп нақтылады министрлікте.

Ведомствоның хабарлауынша, қазіргі заманғы телекоммуникациялық инфрақұрылымды құру нәтижесінде 6-74 жастағы интернет пайдаланушыларының үлесі 2018 жылы - 81,3%-ды (2016 жылы – 76,8%, 2017 жылы-78,8%) құрады.