Мәскеу. 13 маусым. 7kun.kz – Нұрсұлтан Назарбаев Ресей президенті Владимир Путинмен кездесіп оны Ресей күнімен құттықтады. Кездесудің негізгі тақырыбы – Ресей мен Қазақстан арасындағы ынтымақтастықтың 30 жылдығы болды. Бұл туралы Елбасының баспасөз қызметі хабарлады.

Кездесуде Қазақстанның Тұңғыш Президенті мен Ресей Федерациясының Президенті екі ел арасында қарым-қатынас орнағанына 30 жыл толуына орай бір-біріне жылы лебіздерін жеткізді. Тараптар Қазақстан мен Ресей ынтымақтастығы тең дәрежедегі диалог негізінде дамып келе жатқанын атап өтті.

Нұрсұлтан Назарбаев пен Владимир Путин бір-біріне мықты денсаулық және амандық тілеп, арадағы достық байланыс алдағы уақытта да Қазақстан мен Ресей халықтарының игілігі үшін жалғасын табады деген сенім білдірді.