Қазақстан. 20 маусым. 7kun.kz – Белгілі қазақстандық тележурналист Сергей Пономарев Шешенстан президенті Рамзан Қадыровқа жүз мыңдаған шешен халқын құтқарудағы Қазақстанның рөлін еске салды, деп хабарлайды 7kun.kz.

«Маған жан-жақтан 33 рет жіберілген Рамзан Қадыровтың шулы видеосында, ол Ресей Қазақстанды «Егемендігінен айырыла жаздағанда» құтқарды деп айтады. Егемендік туралы дауласуға болады, бірақ оның керегі жоқ шығар. Мен не айтқым келеді? Үшінші буындағы вайнахтардың есте сақтау қабілеті мұндай қысқа деп ойламадым. 1944 жылы ақпанда Кеңес үкіметі басшылығының пікірінше сенімсіз және гитлершілер жағына өтуге дайын ұлт ретінде танылған 500 мыңға жуық шешен Қазақстанға вагондармен, тамақсыз және жылы киімсіз жіберілді», – деп жазды Пономарев.

Ол бұл тұтас бір халықтың ең үлкен қоныс аударуы екенін атап өтті.

«Адамдарға тіпті жиналуға, керекті бұйымдарын, құрал-саймандарды алуға мүмкіндік берілмей, қысы қатты қазақ даласына жіберілді. Лаврентий Берия мұндай «іс-шараларды» мерекелерге айналдырғанды ​​ұнататын. Халықты қатты аязда – 23 ақпанда алып келді. «Жасымық» операциясын 9 наурызда аяқтады. Мен Грозныйда 1990 жылдардың басында жер аударылғандар күні, бірінші шешен соғысы қарсаңында болып, репортаждар жасап, жергілікті тұрғындармен сөйлестім. Елге бір кісідей, көздеріне жас алып оралғандар қазақ халқы туралы ыстық ықыласпен, ризашылықпен, құрметпен айтты! Қазақ халқы қыста далада аштықтан өлулеріне жол бермеді, өздері жартылай аш бола тұра, соңғы нанын екіге бөлді, әлсіреген шешен балаларын үйлеріне панаға алды», – деді журналист.

Ол Шешенстанның бірінші президенті генерал-майор Джохар Дудаев «Қазақстан шешендердің екінші Отаны» екенін эмоционалды және шынайы айтқанын еске салды.

«Баспана беріп, тамақтандырған Отан бұл ұлттың аман қалуына мүмкіндік берді. Онда барлығының жақындарының қабірлері бар, ал Дудаевтың әкесі жерленген. Шешендер мейірімділікті еске алып, Қазақстан мен қазақтарға ризашылықтарын білдірді. Біреу Рамзан Ахматовичтің жадын жаңартып жіберіңдер, мүмкін ол кем дегенде бір минутқа ұялатын шығар», – деп түйіндеді Пономарев.

Айта кетейік, Рамзан Қадыров – Шешенстан республикасының бұрынғы президенті Ахмат қажы Қадыровтың ұлы. Ол өз ұрпағының көптеген басқа шешендері сияқты, депортациядан кейін Қазақстанда дүниеге келген. Атап айтқанда, Шешенстанның қазіргі президентінің әкесінің туған қаласы – Қарағанды.