Алматы. 16 мамыр. 7kun.kz - ҚР Еңбек және халықты әлеуметтік қорғау министрі Бердібек Сапарбаев XII Астана экономикалық форумы аясында Өзбекстанның Жұмыспен қамту және еңбек қатынастары министрі Шерзод Кудбиевпен бірлескен іс-қимыл жоспарына («жол картасы») қол қойды.

Құжат 2019 жылдан 2020 жылға дейінгі кезеңге еңбекші-мигранттардың құқықтарын қорғайды.

Қазақстан Республикасының Үкіметі мен Өзбекстан Республикасының Үкіметі арасындағы еңбекші-мигранттардың еңбек қызметі мен құқықтарын қорғау туралы келісімге ведомство басшылары 2019 жылғы 15 сәуірде Ташкентте ҚР Президенті Қасым-Жомарт Тоқаевтың сапары кезінде қол қойды.

«Үкіметаралық келісім шеңберінде еңбекші-мигранттар қабылдаушы мемлекеттің заңнамасына және еңбек шартының талаптарына сәйкес басқа адамдар үшін қауіпті ауруларға арналған тегін медициналық көмектің кепілдік берілген көлемін алу құқығына ие», - делінген хабарламада.

Сондай-ақ, еңбек мигранттары үшін ақы төлеу және басқа да еңбек жағдайлары жұмыс берушімен қабылдаушы мемлекеттің заңнамасына сәйкес еңбек шартымен реттеледі.