Алматы. 20 ақпан. 7kun.kz – Ұлан Әліпов «ҚазАвтоЖол» ҰК» АҚ басқарма төрағасы міндетін атқарушы болып тағайындалды. Бұл туралы компанияның баспасөз қызметі хабарлады.

"ҚазАвтоЖол" ҰК" АҚ басқарма төрағасы міндетін атқарушы болып Ұлан Әліпов тағайындалды", - делінген хабарламада.

Ұлан Әліпов "ҚазАвтоЖол" АҚ-да бұған дейін де жұмыс істеген. 2013-2014 жылдар аралығында ол компанияның Басқарма төрағасының орынбасары қызметін атқарды. Кейіннен "ҚазАвтоЖолдың" бас директоры болды. Көлік және коммуникация министрлігінің Автомобиль жолдары комитетінде еңбек етті.

Жаңа төраға - техника ғылымдарының кандидаты.

"ҚазАвтоЖол" — Қазақстан Республикасының автомобиль жолдарын басқару жөніндегі ұлттық оператор. Компания халықаралық және Республикалық маңызы бар жолдарды жобалаумен, салумен, жөндеумен және қайта жаңартумен айналысады.