Атырау облысындағы тұтынушылардың құқығын қорғау департаменті 3,5 тонна ресейлік құс етін сауда орындарынан сатылымнан алып тастады. Бұл туралы ведомстваның баспасөз қызметі мәлімдеді деп хабарлайды "Казинформ" агенттігі.
" "Идеал Маркет" ЖШС және "Рамстор Қазақстан" ЖШС супермеркеттерінің желісінен құс етінің сынамалары алынды. Сараптама кезінде өнімдердің Кедендік одақтың "Азық-түлік өнімдері және таңбалау" 022 техникалық талаптарына сай келмейтіндігі анықталды. «Майкопский Птицекомбинат» ЖАҚ өндірісінің "Благояр" құс еті, «Уралбройлер» ЖАҚ өндірісінің тартылған еті және «Даль-Кама» ЖШС өндірісінің "Никора" бройлерінің етінің қаптамаларындағы жазу мемлекеттік тілге аударылмаған. Сауда желілерінің басшыларына тауарларды айналымнан алу туралы санитарлы ұйғарым берілді. Барлығы 3500 келі өнім алынды", -деп хабарлады Атырау облысындағы тұтынушылардың құқығын қорғау департаментінен.
Еске салайық, осыған дейін техникалық тәртіптер мен қауіпсіздік нормаларына сай келмеуіне байланысты ресейлік өндірістің ет өнімдері сатылымнан алып тасталынғандығы хабарланған еді.
