Жамбыл облысы. 16 қараша. 7kun.kz – Жалған құжат дайындаумен айналысқан ХҚКО мен оның сыбайласы ұсталды, деп хабарлайды 7kun.kz  Polisia.kz-ке сілтеме жасап.

Полицейлер көлік құралын тіркеудің жалған куәліктерін (техникалық паспорттарды) дайындағаны үшін Шу ауданының Мамандандырылған халыққа қызмет көрсету орталығының қызметкері және оның сыбайласы – осы мекеменің бұрынғы қызметкері ұстады.

«Әйел делдал ретінде әрекет еткен. 150 мың теңге көлеміндегі заңсыз ақшалай сыйақы үшін сыбайласымен бірге құжаттарды бұрмалау жолымен жалған техникалық паспорттарды дайындаумен және өткізумен айналысқан», – делінген хабарламада.

Тінту барысында күдіктінің атына 8 пластикалық банкомат карточкасы, 41 дайын жалған техникалық паспорт, техника және одан әрі жалған құжаттарды дайындау үшін дайындалған 500 дана пластикалық карточка табылды және тәркіленді.

Осы дерекке қатысты Қылмыстық кодекстің 385-бабы 2-бөлігі бойынша сотқа дейінгі тергеу амалдары басталды. Бірқатар тиісті сараптамалар тағайындалды. Істің басқа да жағдайлары анықталуда.

«Азаматтарға арналған үкімет» мемлекеттік корпорациясының Жамбыл облысы бойынша филиалының PR-менеджері Лаура Жанабаева бұл оқиғаны растамады. Оның айтуынша, ұсталған азаматтар Ахметова И. және Қанатбай М. «Азаматтарға арналған үкімет» КЕ АҚ Жамбыл облысы бойынша филиалының қызметкерлері емес.

«Мән-жайды анықтау барысында Қанатбай М.- ның жеке кәсіпкерлікпен айналысатыны, жеке тұлғаның аумағында кеңсе тауарларын, фотокөшірмелерді және фотосуреттерді басып шығаруды сату бойынша қызмет көрсететіні анықталды», - делінген мемлекеттік корпорация хабарламасында.

Қазіргі уақытта Шу аудандық Халыққа қызмет көрсету орталығының барлық қызметкерлері әдеттегідей жұмыс істеп жатыр, олардың бұл оқиғаға еш қатысы жоқ.