Астана. 21 желтоқсан. 7kun.kz – Заң жобасынан соттан тыс банкроттыққа ұшыраған борышкердің ел аумағынан шығуына тыйым салуды белгілеу туралы норма алынып тасталды, деп хабарлайды 7kun.kz.

Мәжіліс екінші оқылымда «Қазақстан Республикасы азаматтарының төлем қабілеттілігін қалпына келтіру және банкроттық туралы» заң жобасын мақұлдады.

Заң жобасын қарау кезінде депутаттар келесідей түзетулер енгізді:

• Есеп айырысу және өндіріп алу тәртібі үшін берілген мерзімнің 18 айға дейін ұзарту;
• 1600 еселенген АЕК-тен аспайтын мiндеттемелерi бойынша мүлкi бар азаматтардың банкроттық туралы сот тәртiбiн қолдану мүмкiндiгi.
• Уәкілетті органға соттан тыс банкроттық рәсімін жүргізу кезеңінде борышкердің Қазақстан Республикасынан тыс жерлерге шығуына тыйым салуды, сондай-ақ банкроттық рәсімі аяқталғаннан кейін қаржылық сауаттылықты арттыру курстарын өткізу туралы нормаларды белгілеуге құқық беретін нормаларды алып тастау.
• Азаматтың кредиторлар алдындағы мiндеттемелерiн орындаудан жалтару мақсатында банкроттық туралы өтiнiшпен қасақана өтiнiш жасағаны, сондай-ақ банкроттық шеңберiнде жалған мәлiметтер бергенi немесе оны жасырғаны үшiн жауапкершілік белгiленедi.

Негізгі заң жобасы банкроттық рәсімдерінің үш түрін қолдану мүмкіндігін қарастырады – соттан тыс банкроттық, сот арқылы банкроттық және төлем қабілеттілігін қалпына келтіру мүмкіндігі. Соттан тыс банкроттық рәсімі 1600 АЕК немесе 5,09 млн теңгеге дейінгі берешегі бар тұлғаларды қамтиды. Жеке тұлға электронды үкімет арқылы соттан тыс тәртіпте банкроттық туралы өтініш бере алады. Банкроттық белгілі бір шектеулерді тудырады: атап айтқанда, қарыз алушы бес жыл бойы несие ала алмайды.