Мәжіліс депутаттары құқық қорғау органдарының басшыларына сауал жолдады

Мәжіліс депутаттары құқық қорғау органдарының басшыларынан Парламентке келіп, қаңтардағы тәртіпсіздіктерге қатысты тергеу барысы туралы есеп беруін сұрауда. Мәжілісмендер тиісті депутаттық сауалды Бас прокурор Берік Асыловқа жолдады, деп хабарлайды 7kun.kz.

«Жақында әріптестеріміз әр өңірді аралап, осы жиындарда жұртшылық, белсенділер, БАҚ өкілдері қаңтар оқиғасына қашан құқықтық баға берілетінін сұрады. Әрине, депутат ретінде қылмыстық істерге араласып, қандай да бір баға беруге құқығымыз жоқ, соған қарамастан сайлаушылардың тілегі мен талабын тиісті мемлекеттік құрылымдарға жеткізу біздің міндетіміз», – ҚР Парламенті Мәжілісінің депутаты Жанарбек Әшімжан.

Депутат Алматы облысына жұмыс сапары аясында қаңтардағы тәртіпсіздіктер кезінде ұсталғандармен, белсенділермен, адвокаттармен, зардап шеккен кәсіпкерлермен, әскери қызметкерлермен кездесулер өткізгенін, сондай-ақ қираған нысандар мен ғимараттарды өз көзімен көргенін атап өтті.

Мәжілісмен Әшімжан жақында Талдықоған қаласына барып, қамаудағылардың ата-аналарымен және туыстарымен кездесіп, олар азаптаудың әртүрлі түрлерінен өткенін айтты.

«Әлеуметтік желілерде бұл мәселеге қатысты ақпараттар көп. Ал ресми тұлға болмаған соң, болжам мен ойлап табу басым, түрлі қауесеттер тарайды. Ал кейбір ішкі және сыртқы күштер мұны пайдаланып жатыр. Тергеу әдеттегідей жүріп жатқанын түсінеміз, белгілі бір процедуралар бар, бірақ сонымен бірге неге бастапқы дереккөзден ақпарат алу мүмкін емес?», – дейді Жанарбек Әшімжан.

Депутаттың айтуынша, халық тергеу қашан аяқталады, арандатушы кім болды, оқшауланғандардың жағдайы қалай деген сұрақтарға жауап күтіп отыр.

«Бұл сұрақтарға ашық, нақты және жан-жақты жауаптар берілуі керек. Сондықтан тиісті билік құрылымдары, мемлекеттік органдардың басшылары Мәжіліске келіп, осы сауалдарға жан-жақты жауап беруі керек. Бұл сайлаушылардың талабы», – ҚР Парламенті Мәжілісінің депутаты Жанарбек Әшімжан.