Назарбаев: Біз 20 жыл ішінде ұлы даланың дәл ортасында бүкіл әлемге танылған жаңа әсем қала тұрғыздық

295
Назарбаев
Фото: Ақорда

Алматы. 4 сәуір. 7kun.kz — Нұрсұлтан Назарбаев Астананы абаттандыру жөніндегі жобалардың іске асырылу барысымен, сондай-ақ қаланың инфрақұрылымдық және әлеуметтік-мәдени нысандарының құрылыс жоспарымен танысты деп хабарлайды Ақорда баспасөз қызметі. 

Қазақстан президенті Астанада жаңа сәулет және логистика ғамараттарын салу кезінде қала құрылысы саласындағы әлемдік жетістіктерді зерттеп, оларды қолдану қажеттігін атап өтті.

Мемлекет басшысы қаладағы өмір сүру сапасы мен жайлы тұрмыс деңгейін арттыруға бағытталған әлеуметтік жобаларды іске асырудың маңызды екенін айтты.

Сонымен қатар, Нұрсұлтан Назарбаев Астананың 20 жылдығына арналған мерекелік іс-шараларды ұйымдастырып, өткізу мәселесіне баса назар аударды.

– Біз 20 жыл ішінде ұлы даланың дәл ортасында бүкіл әлемге танылған жаңа әсем қала тұрғыздық. Бұл қала халқымыздың мақтанышына айналды. Әрине, бұл – қала әкімшілігінің, құрылысшылардың, сәулетшілер мен осы үдеріске атсалысқан көптеген адамның маңдай терінің жемісі. Біз биыл елордамыздың 20 жылдығын тойлаймыз. Қонақтарымыздың бәріне елорданың жиырма жылда қол жеткізген тартымдылығын, әсемдігін және тыныс-тіршілігінің жоғары деңгейде екенін көрсетуіміз қажет, – деді президент.

Сондай-ақ, Астана қаласының әкімі елорданы одан әрі дамыту және қала тұрғындарының өмір сүру жағдайын жақсартудың негізгі көрсеткіштеріне қол жеткізу үшін атқарылып жатқан жұмыстар жөнінде баяндады.

Соңында Нұрсұлтан Назарбаев бірқатар нақты тапсырма берді.