Алматы. 16 шілде. 7kun.kz – Мемлекеттік бюджеттің кірісі бес айдың қорытындысы бойынша 5,3 трлн теңгеге жетіп, бір жыл ішінде 22,7%-ға артты. Өткен жылдың ұқсас кезеңінде сома 4,4 трлн теңгеге тең болды, ал өсім тек 4,4% - ды құрады. Соңғы бес жылда ұқсас кезеңдегі кірістер орташа есеппен жылына 12,8%-ға ұлғаюда. Мұндай деректерді finprom.kz келтіреді.

Трансферттер есебінсіз мемлекеттік бюджетке 3,8 трлн теңге сомасында кіріс түсті, бұл жоспардың 105,4%-ын құрады. Республикалық бюджеттің кірістері, өз кезегінде, 2,8 трлн теңгені құрады. Жоспар 2,7%-ға немесе 73 млрд теңгеге артық орындалды.

«Асыра орындау негізінен салық есебінен қамтамасыз етілген. Бұған мынадай негізгі факторлар әсер етті: экспорттық кедендік баж салығы мөлшерлемесінің өсуі және бірқатар салаларда тауарлар мен қызметтер өндірісінің өсуі», — деді Әлихан Смайылов.

Мемлекеттік бюджет кірістерінің негізгі бөлігін салықтық түсімдер құрайды, бұл ретте ағымдағы жылы олардың үлесі 72,6%-дан 68,6%-ға дейін төмендеді, ал сома бір жылда 15,9%-ға, 3,7 трлн теңгеге дейін (бір жыл бұрын — 3,2 трлн теңге) ұлғайды. Сонымен қатар, трансферттер түсімі өз үлесін жылына 24,5%-дан 28,9%-ға дейін ұлғайтты.

Салықтық емес түсімдер 85,7 млрд теңгені құрап, 3,9%-ға төмендеді, ал үлесі 1,6%-ға тең (жыл бұрын 2%). Негізгі капиталды сатудан түскен түсімдер 24%-ға, 46,1 млрд теңгеге дейін ұлғайды.

2019 жылдың қаңтар-мамыр айларында трансферттер түсімі 1,5 трлн теңгені құрады.