Мақпал Мейірбекқызы: Биыл біз танитын біраз беделді азаматқа «билікпен бірікті» деген айып тағылып, олардың «антигеройға» айналғанын көрдік.  Парламент сайлауынан кейін бұл «қара тізім» тағы да толығатыны сөзсіз.   Сіз Президенттің сайлауалды штабының агитациялық жұмысына қатыстыңыз. Сенім кеңесінің мүшесісіз. «Жағымсыз кейіпкерге» айналып кетуден  қорықпайсыз ба?

Асхат Садырбай: Қорқатындай қылмыс жасадым деп ойламаймын. Мен президенттің сайлауалды штабына шақырылмай тұрып- ақ,  кімге дауыс беретінімді білдім. Жастардың агитациялық құрамына қосылмасам да, Тоқавты қолдайтын едім.  Бұл менің тәуелсіз журналист ретінде таңдау құқығым. Құқығымды пайдаланғаным үшін кім мені айыптай алады?

Мақпал Мейірбекқызы: Демократиялық елдерде   сіз сияқты тәуелсіз журналист президент сайлауында барлық үміткерге тең қарауға, ешқайсысына симпатиясы барын білдірмеуге тырысады. Өзіміз білетін Познер үміткерді қолдауға үгіттемек түгілі,   өзінің кімге дауыс бергенін ешқашан айтқан емес. Мұндай принцип дұрыс па, бұрыс па?

Асхат Садырбай: Әрине, дұрыс. Мұндай принципті мен де ұстанғым келеді. Жиырма- отыз жылда осындай көзқарас біздің елде  қалыптасады деп ойлаймын.  Сол кезде мен де ешқандай штабта жұмыс істемейтін боламын. Ал Ұлттық Сенім Кеңесіне мүше болуым «биліктің жағына шықтым, әлде жоғары статусқа ие болдым» дегенді білдірмейді.   Бұрын фейсбукте жай ғана жазып жүрген проблемаларды Президенттің алдында айтатын мүмкіндігім пайда болды. Әрине, қоғамның үндемей отырғанынан гөрі сынағаны жақсы. Өзім де біреудің жұмысының кемшілігін байқасам, немесе пікірімен келіспесем, ашық жазамын. Бірақ біз белсенділігімізді сынмен ғана емес іспен де көрсетуіміз керек шығар? Қазір сіз сияқты журналистер  кеңестің бүкіл билігі менің қолымда тұрғандай сынайды . Кеңесті құру туралы идеяның авторы да, оның құрамын бекіткен адам да мен емеспін ғой. Мен ол  жақта  бар болғаны, қырық төрт  мүшенің біреуімін.

Мақпал Мейірбекқызы: Сіздің жай ғана мүше болғаныңыз жауапкершілігіңізді жеңілдетпейтінін түсінетін  шығарсыз?

Асхат Садырбай: Әрине, түсінемін. Маған берілген мүмкіндікті толық пайдалануға тырысамын. Бұл әрекетімнен нәтиже шықса қуанамын, шықпаса басқа шешім шығарамын.

Мақпал Мейірбекқызы:  Сіз фейсбукте жұмысыңызға қатысты жаңалықтарыңызбен бөлісіп отыратыныңызды байқаймын. Бірақ жазда Президенттің сайлауалды штабына қатысатыныңыз туралы, сайлау нәтижесі туралы бір ауыз сөз жазбағаныңызға таң қалдым. Мұндай «тыныштық» режимі  сіздің штабтың жұмысына «ағаларыңыздың» көңілін қалдырмау үшін ғана келіскеніңізді білдіретін сияқты.  

Асхат Садырбай: Шынымды айтсам, бұл туралы неге пост жазбағанымды есіме түсіре алмай отырмын. Штабқа мүше болғанына өкінгендіктен, «ұмытып» отыр деп ойламаңыз. Бұрын екі рет наркоз алғандықтан есте сақтау қабілетім төмендеді. Бәлкім, сторизға салған шығармын.

Мақпал Мейірбекқызы: Сіздің  бұрынғы кандидатыңыз, біздің қазіргі президентіміз әділ сайлауда жеңіске жетті деп ойлайсыз ба?

Асхат Садырбай: Сайлауда бақылаушы болмағандықтан оның әділ өткен, өтпегені туралы жауап бере алмаймын. Бірақ кандидатымның жеңгеніне қуандым.

Мақпал Мейірбекқызы:«Журналист ретінде ешқашан ешқандай партияның мүшесі болмаймын. Бұл - менің өзгермейтін қағидам» деп айтыпсыз. «Нұр Отан» ұсынған кандидатты қолдап, штабтың агитациялық жұмысын атқарған, партияның жиындарына ара - тұра қатысып тұратын адамның  партия мүшесінен айырмашылығы қандай? Түсіндіріңізші.

Асхат Садырбай: Екеуі екі бөлек дүние. Мен  штабта жүргенмен партияға тәуелді емеспін. Партбилетім жоқ. Егер кандидат туралы пікірім өзгерсе,  оны қолдамай қоюға құқығым бар. Ал партия мүшесінің ондай мүмкіндігі жоқ.

Мақпал Мейірбекқызы: Партия мүшесінің басқа мүмкіндіктері бар ғой. Мысалы, ертең  сізге Бауыржан Қыдырғалиұлы хабарласып: «Асхат, штабта жақсы жұмыс істепсіз. Қазір ұлттық кеңесте өзіңізді жоғары деңгейде  көрсетіп жүрсіз. Бізге керек нағыз мемлекетшіл азамат екенсіз. Ешкімге айтпаңыз, жылдың аяғында парламент сайлауы өтеді деп шешілді. Қуаныш Сұлтанұлы «шаршадым, зейнетке шығамын» деп отыр. Оның  орнына сізді отырғызамыз деп  шештік. Осы аптаның аяғына дейін партияның мүшелігіне өтетін құжаттарыңызды дайындаңыз» деп телефонды қоя салды. Сіз не істейсіз?  Партияға қуана-қуана өтесіз ғой?

Асхат Садырбай: Жоқ, қателесесіз. Кеңеске келгелі депутат болғым келмейтінін түсіндім. Екі ай ішінде көрген-білгенімнен қорытынды шығарып, ешқашан депутат болмаймын деп шештім. Сондықтан Бауыржан Байбекке алғыс айтып, бас тартатын едім.Мен мемлекетке депутаттан гөрі журналист ретінде пайдамды көбірек тигіземін деп түсіндіруге тырысамын. Егер сіз айтқандай, менің потенциялым жоғары болса, қоғамдық жұмыстарға араласуыма мүмкіндік беріңіз дер едім.

Мақпал Мейірбекқызы:Сөйтіп Бауыржан Байбекті ренжітіп алатын едіңіз.

Асхат Садырбай:  Ол кісі мені түсінетін еді деп ойлаймын.

Мақпал Мейірбекқызы: Журналист еркіндігін сақтау үшін билікпен де оппозициямен дистанция ұстау керек деген пікірмен келісесіз бе?

Асхат Садырбай: Мен нақты ешқандай басылымның, телеарнаның штатында журналист болып жұмыс істемегеніме бес -алты жыл болыпты.

Мақпал Мейірбекқызы: Дегенмен, өзіңізді журналистпін деп есептейсіз ғой? Сұрайын дегенім, Президенттің кеңесшісі Ерлан Тынымбайұлын, Президенттің көмекшісі Мәулен Сағатханұлын қатты құрмет тұтатыныңыз - сіздің тәуелсіздігіңізді шектемей ме?

Асхат Садырбай:   Шектемейтін сияқты. Ол кісілермен басқа да қоғам белсенділері араласып жүр ғой.

Мақпал Мейірбекқызы: Ол кісілермен араласатын қоғам белсенділері сол үшін сыналып жүр.

Асхат Садырбай:  Ол кісілермен араласу олардың айтқанына көніп, айдағанына жүру деген сөз емес қой.

Мақпал Мейірбекқызы: Егер олардың пікірімен келіспейтін болсаңыз, оны ашық айта аласыз ба?

Асхат Садырбай: Әрине.

Мақпал Мейірбекқызы: Мысалы, Ерлан Тынымбайұлы ютубтағы арнасында  «Ұлттық кеңестің құрамын интернеттегі сайлау арқылы іріктейтін болсақ, кеңеске миллион оқырманы бар түрлі шоу - бизнес жұлдыздары өтіп кететін еді», деді. Сіз  интернеттегі жұртты тобыр емес деп айтқаныңыз есімде. Енді  Ерлан Тынымбайұлының пікіріне көзқарасыңызды білгім келеді?

Асхат Садырбай: Ерлан Тынымбайұлының пікірімен де келісуге болады. Және бұл мәселеге қатысты өзімнің де пікірім бар.

Мақпал Мейірбекқызы: Қандай?

Асхат Садырбай: Ерлан Тынымбайұлы Кеңестің кейбір мүшелеріне қоғамның көңілі толмағандықтан осындай пікір білдірді деп ойлаймын.  Болашақта халық өз адамдарын ұсынса болады. Өз басым біраз адамдардың ауысқанын қалаймын. Парламент депутаттарының ол жақта не үшін жүргенін түсінбеймін. Егер ертең бұл Кеңеске потенциалы менен мықты азамат мүше болғысы келсе,  жолымды беруге дайынмын. Бірақ  жақын арада біздің осы Кеңесте атқарған жұмысымыздың нәтижесі шығады деп ойлаймын.  Сол кезде сіздің де, басқа сыншылардың да пікірі өзгеретін шығар.

Мақпал Мейірбекқызы: Асхат, менің сұрағыма жауап беруіңізді сұраймын. Мысалы: мен де өзімді интернеттегі қауымға жатқызамын. Егер мен сияқты интернетте отырған адамдар Ұлттық Кеңестің құрамын іріктейтін болса,  кілең әншілер өтіп кетер еді деп ойлайсыз ба?

Асхат Садырбай: Енді ол кісі интернеттегі қауым субьективті дауыс береді деп қауіптенген шығар. Жалпы мен мұндай Кеңестерге  құрамды онлайн арқылы да, офлайн арқылы да іріктеу керек деп ойлаймын. Интернетте берілген дауыстың нәтижесін оп-оңай өзгертуге болатынын білесіз ғой.

Мақпал Мейірбекқызы: Мұхтар Тайжан мен Саясат Нұрбектің сұхбатын тыңдадым. Олар бірінші отырыста Президент сөйлегенге дейін Кеңестің қалай жұмыс істейтінін білмеген сияқты көрінді. Шын тәуелсіз адам Кеңеске мүше болмай тұрып, оның қалай жұмыс істейтінін біліп алмай ма? Марғұлан Сейсамбай сияқты өз талаптарын қойып болған соң, шешім қабылдамай ма? Сіз ойланып шешім шығардыңыз ба, жоқ көз жұмып  келісе салдыңыз ба?  

Асхат Садырбай:  Ерлан Қарин хабарласып ұсыныс белдіргеннен кейін біраз ойландым. «Мен ол Кеңеске кіріп, қандай пайда келтіре аламын? Маған еркін сөйлеуіме мүмкіндік беріле ме, әлде жұрттың санын көбейтіп отырам ба», деп сұрадым.

Мақпал Мейірбекқызы: Ол кісі толық еркіндік берілетінін айтты.

Асхат Садырбай: Иә.  Басымды бәйгеге тігіп, кеңеске кіргеннен кейін маған қызмет беретін шығар, тегін үй алар ме екенмін деген тілек болған жоқ. Ал Мұхтар Тайжан мен Саясат Нұрбектің  алғашқы отырысқа дейін Кеңестің жұмысы қалай жүзеге асатынын білмеуін түсінуге болады. Қырық төрт мүше әр аймақта болғандықтан бір-бірімізбен қалай байланысатынымыз, қайтіп жұмыс істейтініміз белгісіз болғаны рас. Отырысқа дейін Кеңес мүшелері болып жұмыс тобында бір-ақ рет жиналдық. Одан кейін тек чатта ақылдасып отырдық. Функциясы, құзыреті қалай болатынын білмегеніміздің себебі - осы.

Мақпал Мейірбекқызы: Былтыр Жандарбек Бұлғақовқа «неге халықтың алдында билікті сынап, президенттің алдында мемлекеттік саясатты мақтайсыздар» деп  сұрақ қойдым. Жандарбек «сіз де қазір менің алдымда осылай өткір сұрақ қойып отырсыз. Ал егер ондай лауазымды адаммен  бетпе-бет кездессеңіз,  дәл осылай сөйлеуіңіз екі-талай», деді.   Рас, біздің президентті сыртынан сынасақ та, кездескенде  қатты құрметтейтінімізді, ерекше жақсы көретінімізді әдемі сөздермен, соғылған шапалақпен білдіруге тырысатын әдетіміз бар ғой.  Президенттің осы Кеңеске Төраға болуы мүшелердің ішкі цензурасын күшейтпей ме?

Асхат Садырбай: Әркімнің өзіне байланысты ғой.  Мысалы: бірінші отырыста Қазыбек Иса ағамыз сөйледі. Өкінішке қарай, ол кісі президентті мақтап, алғыс айтып, біздің тобымызға берілген уақытты тиімсіз пайдаланды. Бес минуттың ішінде тілдің жағдайын ғана емес, өзге де актуальды проблемаларды жеткізуге болатын еді. Енді келесі отырыста өзім сөйлеуге сұранып отырмын. Тобымның мүшелері өтінішіме жауап берген жоқ. Дегенмен маған сөз тиіп жатса бірнеше мәселені көтеретін боламын. Сол кезде менің ішкі цензурамды бағаласаңыз болады.

Мақпал Мейірбекқызы: Жақсы. Енді сіздің Кеңеске дейінгі қоғамдық белсенділігіңізге тоқталғым келеді. Астанада бес қыздың қазасынан кейін  сол кезде еңбек министрі болған Мәдина Әбілқасымованың отставкасын талап еттіңіз. Ал Арыс оқиғасында белсенді болғаныңызбен жауапты министрге қатысты ешқандай сын айтпадыңыз. Себебін білуге бола ма?

Асхат Садырбай: Мен қорғаныс саласын басқарған қай  министрдің бұл трагедияға жауапты екенін білмедім. Бүгінгі министрге отставкаға кетіңіз дейін десем, оған дейінгі министрлердің де тұсында жарылыс болыпты.

Мақпал Мейірбекқызы: Мәдина Әбілқасымоваға дейінгі министрлердің кезінде  көп балалалы отбасылардың жағдайы жақсы ме еді?

Асхат Садырбай:  Дұрыс айтасыз. Бірақ бес қыздың дәл Астанада қаза болуы жаныма қатты батты. Осы оқиғаға дейін Әбілқасымованың жұмысы, жүріс -тұрысы, айтқан сөздері менің қатты сынауыма себеп болған шығар. Өкінбеймін. Сіз ол кісінің министр болғанда мынандай жұмысы нәтижелі болды деп айта аласыз ба?

Мақпал Мейірбекқызы: Жұмысы нәтижесіз болса, неге қазір экономика вице-министрі болып тағайындалды? Қалай ойлайсыз?

Асхат Садырбай:  «Ноу комментс». Әбілқасымовадан кейін екі министр келсе де көп балалы аналар әлі күнге дейін жиырма бір мың теңгелерін ала алмай жүр. Осы оқиғадан атқарушы биліктің де, жергілікті әкімшіліктің де қарапайым мәселені шеше алмайтыны белгілі болды.

Мақпал Мейірбекқызы: Сіз былтыр Ерболат Мұхамеджанның бағдарламасында қонақ болдыңыз. «Жастар саясатта белсенді ме?» деген тақырып көтерілді. Бір саясаттанушы телефон арқылы хабарласып, мемлекеттік қызметте істейтін жастар еркін пікірлерін білдірсе, жұмыстарынан шығарып жіберуі мүмкін деді. Сол кезде  оны «қорқақсыңдар» деп айыптадыңыз.  Сіздің ойыңызша олардың қорқуына себеп жоқ па?

Асхат Садырбай:  Себеп жоқ.  Қандай себеп болуы мүмкін?

Мақпал Мейірбекқызы: Әнуарды айтып, алысқа бармай- ақ қояйық.  Біздің бір әріптесіміз президент сайлауына дейін билікті сынап пост жазып жүрді. Кейін оның үйінің терезесінің сынғанын білдік. Жұмысынан шыққанын естідік. Қазір толық офлайн режимінде жүр. Оның бұлай жүруінің логикалық себебі бар шығар?

Асхат Садырбай: Сіз айтып отырған журналистің сайлауға дейінгі жазған посттары мен қазіргі тыныштық режимінде жүруі көп күмән туғызады. Ол кісіге біреу қысым көрсетті дегенге сенбеймін.

Мақпал Мейірбекқызы:  Жүйені ашық сынап жүрген адамдарға ешкім ешқандай қысым көрсетпей ме?

Асхат Садырбай: «Көрсетеді, не көрсетпейді» деп нақты айту қиын. Оппозициялық алаңда  әртүрлі адамдар жүр. Шын қысым көріп, қиналып жатқандар да, ұпай жинау үшін өзін құрбан қылып көрсеткісі келетіндер де бар сияқты. Бәріне бірдей сенбеймін.

Мақпал Мейірбекқызы: Ерболаттың бағдарламасында сіз  «Мен жер дауы кезінде Алматыда митингке шықтым. Өз позициямды білдірдім. Ешкім мені қамаған жоқ» деп айттыңыз. Ал қазір неге шеруге шыққан адамдарды қамап жатыр? Екінші сұрақ. Сіз кезінде митингке шығыпсыз. Қазір неге қатыспайсыз?

Асхат Садырбай: Қазір менің митингке шықпай-ақ, билікке өз пікірімді айтатын мүмкіндігім бар. Жер мәселесі кезінде жағдай басқаша болған еді. Алматыда өткен митингке қатысқанымды жасырмаймын.  Ал қазір азаматтардың шеруге шығуына биліктің мүмкіндік бермеуінің бір ғана себебі бар деп естідім. Бұған- Аблязов факторы себеп. Осы күнге дейін көп балалы аналар көшеге шыққанда полиция қамаған жоқ қой. Бірақ митингке шыққандардың ішінде ДВК белсенділерінен бөлек қажыған халықтың да бар екенін мойындау керек. Көшеде өз жұмысымен жүрген адамдарды   полицияның  күштеп көліктеріне отырғызып жатқаны маған түсініксіз. Мұны полицияның өзі де түсіндіре алмай жатыр.

Мақпал Мейірбекқызы: Сіз журналиссіз ғой. Кеңестің кулуарында, штабта жүргенде лауазымды тұлғалардан  осы абсурд мәселенің қашан шешілетінін сөз арасында сұрай алмадыңыз ба?

Асхат Садырбай: Мен Ерлан Қариннің өзіңіз сияқты қарамағында жұмыс істедім. Ол кісімен шай ішіп жүргендердің қатарында емеспін. Егер осылай оңаша отырып сөйлесе алсам, ойын білуге тырысатын едім. Мәулен Әшімбаевпен сайлау алдында ел аралап жүрсек те, сөйлесетін мүмкіндігіміз болған жоқ.

Мақпал Мейірбекқызы: Дегенмен, сіз фейбукте «Проблеманы шешу үшін міндетті түрде алаңға шығудың,билікке оппозиционер әкелудің қажеті жоқ» деп жаздыңыз. Соған қарағанда оппозицияны жау санап, билікке бүйрегіңіз бұратын сияқты?

Асхат Садырбай: Мұндай пікірді қашан, не үшін жазғаным есімде жоқ. Парақшамды қарап, жазбамның толық нұсқасын оқуым керек. Негізі оппозиционердің аты Аблязов болса, оған да, оның митингісіне де қарсымын. Менің мемлекетімде қылмыскер Аблязовтың басшы болғанын қаламаймын. Бұл менің позициям.

Мақпал Мейірбекқызы: Түсінікті. Халықтың бір бөлігі қытай зауыттарының Қазақстанда салынғанына қарсы. Бір бөлігі денсаулығы күннен-күнге нашарлап жатқан Жәкішовтың тезірек бостандыққа шыққанын қалайды. Менің білуімше, осы екі мәселені Кеңес мүшелері фейсбук парақшаларында жазғанымен, отырыста көтеріп жатқан жоқ.  Референдумның да өтпейтіні белгілі. Парламент депуттаттары мен мемлекеттік БАҚ-тың бұл мәселелерді көтеруге батылдығы жетпейді. Халықтың бір бөлігі осы мәселелерді митингке шықпай билікке қалай шештіре алады?

Асхат Садырбай: Бұл мәселелердің шешілуіне  халық емес, билік  күш салуға  міндетті. Партиялар да, парламент те ұйқыдан оянып, заң аясында ішкі, сыртқы саясаттағы көкейкесті мәселелерді шешуі тиіс. Олар үшін  халық басын қауіпке тігіп, полициямен соқтығысуы - әділетсіздік. Қарапайым қазақ үшін ең бірінші әлеуметтік саясатты дұрыс жүргізу керек.  Көп балалы, мүгедек балалардың ата- аналарына тиісті көмек берілуі қажет.Энергиясы тасып тұрған жастардың таксист болып жүруіне ақшаға құнығып, зейнетке шықпай жүрген аға буын кінәлі. Егер олар өз эголарын жеңіп, жастарға креслоларын берсе, мотивация пайда болар еді. Мен осы мәселені еңбек министрінің алдында көтердім. Сенім Кеңесінде  экономикалық салаға жауапты топ та осы проблеманы шешудің жолдарын ұсынды.

Мақпал Мейірбекқызы: Зейнетке кімдер шығуы керек? Аттарын атап айта аласыз ба?

Асхат Садырбай: Олар барлық салада бар. Мұғалімдердің арасында да, дәрігерлердің ішінде де, мемлекеттік қызметкерлердің ортасында да.

Мақпал Мейірбекқызы: Қазақстанда сіз айтып отырғандай шешілмеген мәселе көп. Біздің бағымызға қарай, жастардың бәрі жағымпаз, жалтақ емес. Билікке, мемлекетке көңілі толмайтындарға сіз «мемлекет ұнамаса, мархабаттат, басқа елге үндемей- ақ көшіп кетіңдерші. Бізге қазір патриот жастар керек», деп жазыпсыз. Қазақстанда бірдей ойлайтындар, мемлекетті қолдайтындар ғана тұруы керек пе?

Асхат Садырбай: Жоқ, сіз мені түсінбепсіз. Керісінше, мен оларға өзге елді аңсамай, өз елімізді өзімізге ұнайтындай етіп өзгертейік деп айтып жүрмін. Мемлекеттің болашағы үшін күресіп, сотталып жатқан адамдар  ақымақ па? Киіміңді чемоданға салып, әуежайдан билет алып, Америкаға кетіп қалу-ең оңай жол. Мен оларды қайрау үшін сіз мысалға алып отырған постты жазған шығармын. Білімді жастардың Қазақстанда қалып, өзгеріс жасауға үлес қосқандарын қалаймын.

Мақпал Мейірбекқызы: Айсұлтан Сейітов мен Нұрлан Сабуровтың өмірін алайықшы.  Олар кезінде елді емес, өздерін дамытқысы келіп, шетелге кетті. Екеуінің таңдаған жолдары дұрыс емес деп айта алмаймыз ғой. Байқасаңыз, екеуі де сұхбаттарында Қазақстандағы жүйенің кемшілігін айтып жүр.

Асхат Садырбай: Олар біздің проблеманы сырттан айтуы керек.  Себебі, олардың айтқандары жоғарыдағыларға тез жетеді.  Ал біз іште  күресуіміз керек. Айсұлтан мен Нұрланның өнер адамдары болғандықтан шетелде дамығандары, танылғандары дұрыс.

Мақпал Мейірбекқызы: «Мен өз тарихын білмейтін, бірақ әншілердің өмірін жаттап алған жастары бар елде ояндым», деп «Оян, Қазақстанның» риторикасына сүйеніп, пост жаздыңыз. «ХИТ-Қазақстан», «Шіркін -лайф», «Түнгі студио» жобаларын шығарып, әншілерді кумиризациялау  процесіне үлес қостым деп ойламайсыз ба?

Асхат Садырбай: Үш бағдарламаға  да әншілердің қатысқаны рас. Бірақ  олардың өмірі насихатталған жоқ.

Мақпал Мейірбекқызы: Әншілерді эфирден  жиі көрсетіп, жиі сұхбат құрмағанда, олардың өміріне жастар қатты қызықпайтын еді деп ойлаймын.

Асхат Садырбай: Біз  елге танымал әншілерді ғана шақырдық. Қарапайым орындаушыны жарнамалап халыққа танытқан жоқпыз. Екіншіден, бағдарламамызда басқа саланың адамдарын да қамтуға тырыстық.

Мақпал Мейірбекқызы: Шоу-бизнестен шаршағаныңызды, ол әлемнің сізге ұнамайтынын байқаймын.  Бірақ,  тележобаларыздың барлығы сол әншілермен байланысты.  Қашан бағытыңызды өзгертіп, жаныңыз қалайтын танымдық, тарихи немесе саяси дүниелерді қолға аласыз?

Асхат Садырбай:  Телеарнаның басшылары маған сіз айтқан жанрдағы жобаларды ғана ұсынғандықтан амал жоқ, келісіп жүрдім.  Бұдан-былай  бағытымды өзгертіп,  салмақты дүниелерді қолға алғым келеді. Былтыр ютуб арнамды ашып, өз қаржыма «Үлкендердің әңгімесі» деген бағдарлама түсірдім.

Мақпал Мейірбекқызы: Сіз өзіңіз жассыз. Жастар ұйымын басқарасыз. Аудиторияңыз жастарды қамтиды. Жастардың алаңына айналған ютубтан кетіп,  көрермені күннен күнге азайып жатқан телевизияға баруыңызға не себеп болды? 

Асхат Садырбай:  Қысқаша жауап берейін. Қаражат себеп болды. Айлық төленетін болғандықтан телеарнаны таңдадым. Егер маған қазір бір телеарна «Хит Қазақстан» сияқты жоба ұсынса,  баруға мәжбүрмін. Себебі ютубта еркіндік болғанмен қаражат жоқ.

Мақпал Мейірбекқызы: Өкінішке қарай, жастардың көбісінің өзі қалайтын жұмыспен айналысуға мүмкіндігі жоқ. Неге?

Асхат Садырбай:  Менің жағдайымда үкімет емес, өзім кінәлімін деп ойлаймын. Пысық болмағандықтан қызметім өспеген шығар. Пысық болмағандықтан бай емес шығармын.

Мақпал Мейірбекқызы: Қызметтің өсуі үшін, бай болуы үшін білім, талант, кәсібилік, еңбекқорлық емес, пысықтық керек пе?

Асхат Садырбай: Әрине, білімді, талантты, еңбекқор адамдар да мақсатына жетеді. Бірақ олардың жолы ауыр сияқты.

Мақпал Мейірбекқызы: Ісіңізге сәттілік тілеймін.  Сұхбатыңызға рахмет!