Астана. 4 қаңтар. 7kun.kz - Астаналықтар Қарағанда облысы Шахан елдімекеніндегі тұрғын үйдің құлауынан зардап шеккендерге арнап азық-түлік пен жылы киімдер жинайтын пункт ашты. Бұл туралы "Атамекен" ҰКП-ның басқарма төрағасы Мұрат Әбенов Facebook-тегі парақшасында жазды.
"Құрметті Астана қаласының тұрғындары! Қиын жағдайда қалған ағайынға қолдау жасаймын дегендер болса бүгіннен (3 желтоқсан) бастап жұма күнге дейін 10:00-1:00 уақыт аралығында Момышұлы мен Сәтбаев көшелерінің қиылысында орналасқан "Белый ветер" дүкенінің сол жағындағы кіреберісте, 3-ші қабаттағы офиске заттарды өткізе алады. Есік ашық тұрады. Жиналған заттар сенбі күні апат болған елді мекенге жөнелтіледі", - деп жазды ол әлеуметтік желідегі парақшасында.
Оның сөзінше шара Ерлан Сайыров пен Ақберен Елгезектің бастамасы арқылы ұйымдастырылған. Барлық ақпарат #ШаханКөмек хэштегімен жарияланады. Қосымша ақпаратты 87770411470, 87017074010 телефондары арқылы алуға болады.
"Осындай көмекті басқа қалаларда көрсетем деушілер болса, белсенді топ құрып ұқсас шараларды ұйымдастыруды ұсынамыз. Біз қолдауға дайынбыз. Зардап шеккен отандастарымызға қол ұшын берейік", - дейді шенеунік.
Айта кетейік, қайғылы жағдай 1 қаңтар күні кешке Шахтинск маңындағы Шахан елдімекенінде болды. Үйінділер арасынан 5 адам құтқарылды, оның екеуі бала. 9 адам қайтыс болды.
Құтқару жұмыстарына 280 адам тартылды. Олардың арасында полиция қызметкерлері, жергілікті атқарушы органдар, жедел жәрдем бригадасы, Ұлттық гвардияның ауыр инженерлік техникасы және жеке кәсіпкерлер бар.
Похожие материалы
