Алматы облысы. 10 тамыз. 7kun.kz – Ұзынағаш ауылындағы жас жігіттің өліміне қатысы бар деген күдіктілерге сот санкциясымен іздеу жарияланды, деп хабарлайды 7kun.kz Polisia.kz-ке сілтеме жасап.

Алматы облысы Полиция департаменті келесі тұлғаларға іздеу салады:

• Қозыбаев Ғани Мұратұлы - 31 жаста, ҚР Қылмыстық кодексінің 99-бабы 2-бөлігі 1,7,9-тармақтары (Адам өлтіру) және 293-бабы 3-бөлігі 2-тармағы (Бұзақылық) бойынша аса ауыр қылмыс жасады деген күдік бойынша;
• Асқар Жәнібекұлы Тыныштықов - 30 жаста, ҚР Қылмыстық кодексінің 24-бабы 3-бөлігі (Қылмысқа дайындалу және қылмысқа оқталу) және 99-бабы 2-бөлігі 1,7,9-тармақтары (Адам өлтіру), 293-бабы 3-бөлігі 2-тармағы (Бұзақылық) бойынша аса ауыр қылмыстар жасады деген күдік бойынша;
• Серікбол Мұратбекұлы Шөкенов - 30 жаста, ҚР Қылмыстық кодексінің 293-бабы 3-бөлігі 2- тармағы (Атыс қаруын қолданып бұзақылық) бойынша қылмыс жасады деген күдік бойынша;
• Нұрсұлтан Бахтиярұлы Аукенов - 30 жаста, ҚР Қылмыстық кодексінің 293-бабы 3-бөлігі 2-тармағы (Бұзақылық) бойынша аса ауыр қылмыс жасады деген күдік бойынша.

Алматы облысының полициясы осы адамдар туралы ақпараты барларға мына телефондар бойынша хабарлауын сұрайды: +7 701 500 08 47, +7 700 200 07 88, +7 702 717 77 17, +7 707 738 78 78, +7 72770 2 26 02 немесе 102.

Айта кетейік, Алматы облысының Ұзынағаш ауылында атыс болып, бір адам қаза тапқан еді. 4 тамызда Ұзынағаш ауылындағы ауруханаға оқ жарақатымен үш жергілікті тұрғын жеткізілді. Зардап шеккендердің бірі жансақтау бөліміне жеткізілгеннен кейін қайтыс болды.