Алматы. 1 наурыз. 7kun.kz - ҚР ИДМ вице-министрі Арыстан Қабыкеновтың жұмыс сапары аясында Қазақстанның Швейцариядағы Елшілігінің қолдауымен, 27 ақпанда Женевада ЮНКТАД инвестициялар және кәсіпкерлік бөлімінің директоры Джеймс Джанмен кездесу өткізілді.

Кездесу барысында ЮНКТАД тарапынан Қазақстанға модельдік инвестициялық келісімшартты әзірлеу бойынша техникалық және консультациялық қолдау көрсету, инвестициялық келісімдер бойынша тренингтік семинарлар өткізу мүмкіндіктері және Ұлттық инвестициялық стратегияны жүзеге асыру мәселелері талқыланды.

Сондай-ақ, департамент мемлекеттік тапсырыс негізінде келесі бағыттар бойынша техникалық көмек көрсетеді:

1) Инвестициялармен байланысты реттеуді, стратегияларды және саясатты әзірлеу мен іске асырудағы әлеуетті арттыру.

2) Инвестицияларды тарту жөніндегі агенттіктерге көмек көрсету, шетелдік инвестицияларды тарту және инвестицияларды сақтауға қажетті институционалдық тетіктер мен тиімді басқаруға қатысты мәселелер. Агенттіктер қызметіндегі инвестициялар тарту бойынша озық тәжірибелер туралы ақпаратты қамтитын инвестицияларды дамыту агенттіктеріне шолу.

3) Халықаралық инвестициялық келісімдерге (ХИК) мониторинг жүргізу, ХИК бойынша келіссөздер жүргізудің нұсқаулықтарын әзірлеу, сондай-ақ, ХИК негізгі мәселелеріне сараптамалық кеңес беру.

4) Өңірлік және ұлттық деңгейлерде ХИК бойынша кәсіби даярлау және әлеуетті нығайту бойынша тренингтерді ұйымдастыру.