Алматы. 28 сәуір. 7kun.kz - Ұлттық банк 27 сәуірдегі № 67 қаулысымен 27 шілдеге дейін Qazaq Banki-нің жеке тұлғалардың депозиттерін қабылдауға, жеке тұлғалардың банк шоттарын ашуға арналған лицензиясын тоқтатты. Бұл туралы ҰБ баспасөз қызметі хабарлады.

Бұл шешімді Ұлттық банк банктің банктік заңнама талаптарын жекелеген бұзушылықтарына қадағалаушылық реттеу шеңберінде және «Қазақстан Республикасындағы банктер және банк қызметі туралы» Қазақстан Республикасы Заңының 48-бабының 1-тармағы в) және г) тармақшаларында көзделген негіздер бойынша, төлем және аударым операциялары бойынша шарттық міндеттемелерді үнемі (қатарынан күнтізбелік он екі ай ішінде үш және одан көп рет) тиісінше орындамау және үнемі (қатарынан күнтізбелік он екі ай ішінде үш және одан көп рет) пруденциялық нормативтерді және (немесе) басқа сақталуы міндетті нормалар мен лимиттерді бұзғаны үшін қабылдаған.

Сонымен қатар, лицензияның жаңа депозиттерді тартуға және жеке тұлғалардың жаңа банк шоттарын ашуға қатысты тоқтатыла тұрады және банктің қолданыстағы депозиттері мен клиенттеріне қызмет көрсетуге қатысы жоқ екені айтылады.

2018 жылғы 1 сәуірдегі жағдай бойынша банк жеке тұлғаларының қабылданған депозиттерінің көлемі 41 млрд теңге болған. Банктің жеке тұлғалардың депозиттік портфелінің үлесі банк жүйесі бойынша жеке тұлғалардың депозиттерінің жиынтық көлемінің 0,5 пайызы болды.