Алматы. 29 шілде. 7kun.kz – Алматы облысында ауыл шаруашылығы қарқынды дамып келеді.

Әкімдіктің мәліметі бойынша, өңір халқының 80%-ы – ауыл тұрғындары, сондықтан жергілікті билік агроөнеркәсіп кешенін дамыту бойынша бірқатар шаралар қабылдауда. Бұған дейін облыс әкімі Амандық Баталов 2019 жылы қайта өңделген ауыл шаруашылығы өнімдерінің экспорты 3%-ға (82,5 млн долларға дейін) ұлғайып, 4 мың тонна ет экспортталатынын айтты. Ағымдағы жылдың мамыр айында Алматы облысына келген Қасым-Жомарт Тоқаев «Жетісу қарқынды дамып келе жатқанын және ауыл шаруашылығы өндірісінің көлемі бойынша көшбасшы болып табылатынын» атап өтті.

Тағы 138 мың гектар суармалы жерді қалпына келтіру жоспарда бар. Оның 40 мыңы ағымдағы жылы қалпына келтірілуі тиіс. Бұл бағыттағы жұмыстар Ескелді, Алакөл, Ақсу, Көксу аудандарында Ислам Даму Банкінің қолдауымен басталды. Айта кетерлік жайт, өңірдегі жерлерді тексеру 2015 жылдан бастап жүргізіледі. Осы уақыт ішінде 496 мың гектар пайдаланылмай жатқан ауыл шаруашылығы жерлері анықталды. Олардың 363 мыңы іске қосылды, 120 мың гектардан астамы мемлекет меншігіне қайтарылды.

Бақша алқабын 26 мың гектарға жеткізу міндеті тұр. Қазір бақтар 23 мың гектар жерді алып жатыр. Яғни, алдағы жылдары алма, алмұрт, өрік және басқа да жеміс ағаштары 3 мың гектарға жуық алқапқа отырғызылады. Мұндай нәтижеге жаңа бақтарды отырғызу және ескі бақтарды қалпына келтіру арқылы қол жеткізіледі деп күтілуде. Апортты қалпына келтіру ерекше мәселе. Облыс әкімдігінің баспасөз қызметі хабарлағандай, облыста апорт сортына 1,6 мың гектар жер бөлінген, оның 743 гектары жеміс береді.

Тағы бір маңызды мәселе – ғылым мен ауыл шаруашылығының бірігуі. Бұл үшін Талдықорғанның маңында «Агропарк Талдықорған» зерттеу орталығы ашылды. Мұнда облыстағы басым дақылдар (қант қызылшасы, жүгері және соя) зерттеледі. Орталықта аграршылардың жұмысын оңтайландыруға және өнімділігін арттыруға көмектесетін заманауи технологиялармен танысуға болады.