Алматы. 27 тамыз. 7kun.kz – Алматы полициясы адамдарға жаппай шабуыл жасаған екі көлікті де тәркіледі. Бұл туралы полиция департаментінің баспасөз қызметі хабарлады.

Тергеу басқармасының мәліметі бойынша, ҚР Қылмыстық кодексінің 24-бабы, 3-бөлімі бойынша тергеліп жатқан қылмысты істің заттай айғағы ретінде екі көлік - ақ түсті Тoyota Camry мен қара түсті Toyota Avensis табылды.

«Екі көлік құралы да қылмыстық зертханада тексерілді, адам қаққанының белгісі бар. Тиісті сараптама тағайындалды. Қазір көліктер мамандандырылған автотұраққа қойылды, қылмыс құралы болғандықтан оларды қолдануға тыйым салынды», - деді Алматы қалалық ПД тергеу басқармасы басшысының орынбасары полиция подполковнигі Думан Аухадиев.

Сондай-ақ ол түнде полиция жедел бөлімінің қызметкерлері Алматы облысы Еңбекшіқазақ ауданының тұрғыны, 1995 жылы туған А. есімді азамат қолға түскенін айтты. Ол Toyota Camry маркалы көлікті тізгіндеген. Қазір ол уақытша ұстау изоляторында.

«Қара түсті шетелдік көліктің жүргізушісі анықталды. Оны ұстау - уақыт еншісінде. Ол адамдарды қаққан Toyota Avensis көлігі табылды және тұраққа қойылды. Бұл іс барысында тергеу жан-жақты және әділ жүргізіледі», - деді подполковник Аухадиев.

Естеріңізге сала кетейік, 26 тамыз күні түнде Гагарин көшесінде үш ер адамды қағып кеткен. Оқиға куәгерлерінің бірі «төбелес болды және олардың бірі қарсыластарын көлікпен қағуды шешті» деп айтты. Алматы полиция департаменті оқиғаға түсінік беріп, күдіктілердің жеке тұлғалары анықталғанын хабарлады.