Дереу жеткізілетін алтынның бағасы сауданың қатарынан алтыншы күні өсіп келеді, бұл 2012 жылдың тамызынан бері ең ұзақ жоғарылау мерзімі деп хабарлайды Bloomberg агенттігі.

Нью-Йорктегі биржа саудасының барысына дереу жеткізілетін алтын 0,4%-ға, троя унциясы үшін $1197,67 дейін қымбаттады. Сәуір айында жеткізілуі қарастрылған фьючерстік келісім-шарттардың бағасы 0,5%-ға, унциясына $1197,3 дейін жоғарылаған.

Сәрсенбі күні АҚШ-та ақпан айында ұзақ мерзімді пайдалануға арналған тауарларға деген тапсырыстардың көлемі алдындағы аймен салыстырғанда 1,4%-ға төмендегендігі белгілі болды. Bloomberg агенттігі сұрастыған сарапшылар бұл көрсеткіштің 0,2%-ға өсуін күткен еді.

"Тапсырыстарға қатысты төмен көрсеткіштер доллар бағамының төмендеуіне және алтын бағасының өсуіне әкеліп соқтырды", - деді Alliance Financial LLC аналитигі Фрэнк МакГи.