Нұр-Сұлтан. 24 мамыр. 7kun.kz  – Атом электр станциясын орналастыратын орын әлі таңдалған жоқ, бірақ еліміздің оңтүстігіндегі Балқаш көлінің аумағы құрылыс алаңы болуы мүмкін, деді ҚР Энергетика министрі Болат Ақшолақов Үкімет отырысында журналистерге.

"Станцияның параметрлерін түсінеміз, қуаттылығы шамамен 2,4 ГВт. Орналасқан жеріне келсек, бұл Балқаш болуы мүмкін. Бұл аумақ бұрыннан, кеңестік кезеңнен бері зерттеліп келеді. Нақты орналасқан жері бойынша әлі нақты мәлімет жоқ", - деді Ақшолақов.

Бұған дейін Ақшолақов АЭС құрылысы үшін екі учаске – Шығыс Қазақстан облысындағы Курчатов қаласы мен Алматы облысындағы Үлкен ауылы қарастырылып жатқанын айтқан. Әсіресе, Үлкен ауылының маңында Юг-ГРЭС учаскесі мен Балқаш көлі бар. Бұл учаске сонау Кеңес Одағы кезінде атом электр станциясын салуға ықтимал алаң ретінде қарастырылған.