Қазақстандықтар 91,3 млрд теңгеге мүліктерін заңдастырған. Бұл мәліметті ҚР Қаржы министрлігінің мемлекеттік кірістер жөніндегі комитеті 2015 жылдың 2 наурызындағы ахуал бойынша жария етті. Қазақстан аумағында 91,3 млрд теңгеге мүлік заңдастырылған. Акция басталғалы жалпы құны 198,3 млрд теңге болатын 23 мың өтініш келіп түсті. Оның ішінде тұрғын-үй объектілерінің жалпы құны 143 млрд теңгені, тұрғын-үйлік емес объектілердің құны 53,3 млрд теңгені құрады. Сонымен бірге қазақстандықтар заңды тұлғалар қатысымының үлестері (0,7 млрд теңге) мен құнды қағаздарды (0,8 млрд теңге) да заңдастыруға ниет білдіріп отыр. 6 өтініш білдіруші шетелдік мүліктерін 215,9 млн теңгеге заңдастыруды қалап отыр. Жалпы құны 211,4 млн теңге болатын 3 тұрғын-үй объектісі, 1,5 млн теңге болатын бос нысан және екі заңды тұлғаның 3 млн теңгеге бағаланған үлестері заңдастырылатын болады. 2015 жылдың 2 наурызы бойынша 110,1 млн теңгені құрайтын 3 нысан заңдастырылды. Ұлттық банктің мәлімдеуінше, ағымдағы жылдың 27 ақпанындағы ахуал бойынша қазақстандықтар 10,3 млрд теңге көлемінде 69 жинақ шоттарын ашқан. Ел экономикасына 2,3 млрд теңге көлемінде инвестиция салынған.