Елімізде соңғы бес жылдың ішінде ауыл шаруашылық өнімінің жалпы көлемі шамамен екі есе артты. Бұл туралы ҚР ауыл шаруашылығы министрі Асылжан Мамытбаев мәлімдеді деп хабарлайды Премьер-Министрдің ресми сайты.

"Соңғы бес жыл ішінде ауыл шаруашылығы өнімінің жалпы көлемі шамамен екі есе өсті де өткен жылы 2,5 трлн теңге болды", - деді А.Мамытбаев.

Оның айтуынша, бес жылдық кезең ішінде экспорт 1,6 есе өсіп, шамамен 3 млрд долларды қамтыды. Бұл ретте, министр ұн экспорты бойынша Қазақтан соңғы 6 жыл ішінде дүние жүзінде көшбасшы орында екендігін, негізгі капиталға деген инвестициялар артып жатқандығын баса айтты.

Мекеме басшысының сөзіне сүйенсек, мысалы,өткен жылы негізгі капиталға болған инвестициялар көлемі шамамен 1 млрд доллар болған және осы инвестициялардың өсімі 16%-дан асып түскен.

"Экономика салаларының ішінде бұл өсімнің ең жоғары қарқыны, қазірдің өзінде кәсіпкерлер ауыл шаруашылықты тартымды бизнес ретінде қарастырады. Қазір ірі кәсіпкерлерде ет комбинаттарын, бордақылау алаңдарын, сүт-тауар фермаларын, ауыл шаруашылығы саласындағы басқа кәсіпорындарды салу жөніндегі үлкен жоспарлары бар", - деп мәлімдеді министр.