Yum Brands Inc. концерніне тиесілі KFC жылдам тамақтану ресторандарының желісі қытайлық үш медиа-компанияны сотқа берді, оларға KFC-дің ет өнімдерінің сапасы төмен деген алып-қашпа әңгімелерді таратты деген айып тағылып отыр деп хабарлайды Wall Street Journal.

Атап айтқанда, компаниялар KFC ресторандарында тағамдарды әзірлеу кезінде сегіз аяғы және алты қанаты бар тауықтар пайдаланылады деген. Бұл ақпарат жергілікті әлеуметтік желілер мен микроблогтар арқылы таратылды. KFC компаниялардың әрқайсысынан 1,5 млн юань (шамамен 245 мың доллар) көлемінде өтемақы алмақ және жалған ақпаратты таратқан үшін көпшілік алдында кешірім сұрауды талап етуде. Осылайша KFC Қытайдағы беделін қалпына келтірмек, мұнда компания өз түсімінің жартысын алып отыр. Атап айтқанда, бұған дейін фирма құстарды өсіру кезінде гормонды дәрі-дәрмектер мен антибиотиктерді пайдалануға қатысты дау ортасында қалған болатын. Содан соң KFC басшылығы жеткізушілерді таңдаудағы өз тәсілін өзгертуді уәде етті. 21 наурызда аяқталған бірінші қаржылық тоқсанда ҚХР-дағы ресторандар желісінің түсімі жылдық есепте 9%-ға, 1,26 млрд долларға дейін төмендеген. Жалпы әлем бойынша бұл көрсеткіш те 9%-ға қысқарып, 2,62 млрд долларды қамтыды.