Алматы. 1 тамыз. 7kun.kz – ҚР Ұлттық банкі 2018 жылғы 16 шілдеден бастап банктердің ипотекалық несие бойынша банк шотын жүргізгені үшін комиссия алуына тыйым салды.

Бұл комиссиялар тізбесін оңтайландыру үшін және несие алу және оған қызмет көрсету кезінде қарыз алушылардың шығыстарын қысқарту шеңберінде жасалып отыр.

Ұлттық банктің бастамасы бойынша 2018 жылғы 16 шілдеден бастап «Банктер туралы» заңға ипотекалық несие беруге және оған қызмет көрсетуге байланысты банк шотын жүргізгені үшін банктердің комиссиялар белгілеуіне және алуына тыйым салды.

Сондай-ақ, заңның нормасы қолданысқа енгізілгеннен кейін 2018-жылдың 16-шілдесінен кейін жеке тұлғалармен жасасқан ипотекалық несие шарттары бойынша банк шотына қарызды есепке алуға тыйым салу енгізілді.

«Осындай норма қазіргі кезде ҚР Парламенті Мәжілісінің қарауындағы «Қазақстан Республикасының кейбір заңнамалық актілеріне меншік құқығын қорғауды күшейту және төрелік мәселелері бойынша өзгерістер мен толықтырулар енгізу туралы» заң жобасында қамтылған. Кәсіпкерлік қызметпен байланысты емес барлық жеке тұлғаларға қатысты қарыз беруге және оған қызмет көрсетуге байланысты банк шотын жүргізгені үшін банктер комиссия алмайды», - делінген Ұлттық банк хабарламасында.

Ұлттық банк 2016 жылғы 30 мамырда жылдық тиімді сыйақы мөлшерлемесін есептеу кезінде ескерілетін, жеке тұлғаға берілген банктік қарыз және шағын несие беруге және оларға қызмет көрсетуге байланысты комиссиялар мен өзге де төлемдердің тізбесін бекіткен болатын.

Комиссиялар тізбесі банктер өндіріп алатын комиссиялар санын айтарлықтай қысқартуға және оларды атаулары мен мағыналық мәндері бойынша бірегейлендіруге мүмкіндік берді.

Аталған тізбек 2016 жылдың 1-шілдесінен бастап қолданысқа енгізілген болатын.

Бұл ретте, жеке тұлғалармен 2016 жылғы 1 шілдеге дейін жасалған банктік қарыз шарттары бойынша банктер, банктер туралы заңның 39-бабына сәйкес, банктік қарыз шартында көрсетілген және Операциялар жүргізудің жалпы талаптары туралы қағидаларда белгіленген комиссияларды алуға құқылы.