Нұр-Сұлтан. 3 маусым. 7kun.kz – Сенат төрағасы Мәулен Әшімбаев 5 маусымдағы референдумда бюллетеньдерде неліктен бір ғана сұрақ болатынын және адамдар Конституцияға енгізілген әрбір түзету үшін жеке-жеке дауыс бере алмайтынын түсіндірді, деп хабарлайды 7kun.kz.

«Заңнамамызға және қалыптасқан тәжірибеге сәйкес біз бір бюллетень бір сұрақ деп қабылдадық. Бұл халыққа ыңғайлы және халық бұл тәжірибеге 30 жыл бойы үйренген. Бүгінде салыстырмалы кестеде Конституцияның 33 бабына 56 түзету енгізілді. Сайлау учаскесіне келген әрбір азамат 56 бюллетеньді жеке-жеке толтыруы керек деп елестету өте қиын. Бұл өте күрделі процесс", – деді Сенат Төрағасы

Мәулен Әшімбаев саяси аспектінің де бар екенін және оның аса маңызды рөл атқаратынын айтты.

«5 маусымда Қазақстан халқы жеке-жеке емес, тұтастай алғанда еліміздің жаңаруы, президентіміздің жаңғыру бағыты, еліміздегі өзгерістер, басты заң үстемдігі және заң алдында барлығы тең болатын шын мәнінде әділ Қазақстанды құруымыз үшін дауыс беретін болады", – деді Сенат төрағасы.

Ол бұл саяси дауыс беру болатынын атап өтті.

«Саяси мәселе стратегиялық маңызы бар референдумға шығарылатынын түсіну керек және азаматтарымыз Қазақстанның жаңаруы, еліміздегі өзгерістер үшін немесе барлығын сол қалпында қалдыру үшін нақты, қысқаша жауап беруі тиіс», – деп түйіндеді Мәулен Әшімбаев.