Алматы. 9 сәуір. 7kun.kz – ҚР Тұңғыш Президенті Нұрсұлтан Назарбаев Сыртқы істер министрі Бейбіт Атамқұловты қабылдады. Кездесу барысында Нұрсұлтан Назарбаевқа министрліктің ағымдағы қызметі мен алдағы жұмыс жоспарлары туралы ақпарат ұсынылды. Бұл туралы ҚР Тұңғыш Президентінің баспасөз қызметі хабарлады.

Елбасы сыртқы саяси бағытымыздың сабақтастығын қамтамасыз етудің және Қазақстанның стратегиялық серіктестерімен ынтымақтастықты нығайтуға бағытталған шараларды жоспарлы іске асырудың маңыздылығын атап өтті.

«Елімізде өте маңызды саяси өзгерістер болды. Биліктің қалыпты әрі бейбіт жолмен берілуін қамтамасыз етіп, бүкіл әлемге Конституция аясында әрекет ететінімізді көрсеттік. Бұл – барша жұрт үшін айтулы оқиға. Қазір ең бастысы – осыған дейін қалыптасқан сыртқы саяси бағытымыздан айнымау. Ең алдымен, жақын көршілерімізбен арадағы қатынастарға назар аудару керек. Бұл қатынастар өзара сенімге негізделуге тиіс», – деді Нұрсұлтан Назарбаев.

Сондай-ақ, Қазақстанның Тұңғыш Президенті, шет елдерге жасалатын сапарларға және халықаралық іс-шараларға мұқият дайындалу қажеттігін баса айтты.

«Қазіргі таңда мынадай мәселелерге баса мән беру керек. Біріншіден, Оңтүстік Корея Президентінің Қазақстанға сапары. Екіншіден, «Бір белдеу, бір жол» форумына қатысу үшін Қытай Халық Республикасына жасалатын сапар. Сонымен қатар, Еуразия экономикалық одағының мерейтойлық саммитін өткізу үшін жақсылап дайындалу керек. Оның бес жылдығын елордамызда атап өтеміз», – деді Елбасы.

Сыртқы істер министрі Б.Атамқұлов елімізде болған саяси оқиғаларды халықаралық ұйымдардың басшылары оң бағалап жатқанын жеткізді.

«Халықаралық ұйымдардың басшылары Қазақстанның халықаралық міндеттемелерді жүзеге асыра беретініне сенім білдіруде. Әлемдік қоғамдастық Сіздің жаһандық бастамаларыңызды және қауіпсіздікті қамтамасыз етуге қосқан үлесіңізді, соның ішінде ядролық қарусыздану мен ядролық қаруды таратпау ісіне сіңірген еңбегіңізді жоғары бағалауда», – деді Атамқұлов.